Mearrasámi Silje lea nanu nisu boahtteáigái

Sámediggepresideanta berre sihke dustet daid riđuid mat bohtet go sámi áššiiguin bargá ja maiddái máhttit movttiidahttit olbmuid. Ja sus fertejit leat čielga višuvnnat boahtteáigái. Silje Karine Muotka deavdá buot dieid eavttuid.

Kategori
NSR
Forfatter
NSR
Dato
07.08.2021
NSR

Mearrasámi Silje lea nanu nisu boahtteáigái

Dan oaivvildeaba sihke NSR jođiheaddji Runar Myrnes Balto ja dálá Sámediggepresideanta Aili Keskitalo.

– Silje lea dál áidna guhte sáhttá deavdit presideanttarolla albma láhkai. Ferte šaddat Silje, jurddašii Runar Myrnes Balto go Aili Keskitalo dieđihii ahte ii šat dáhto searvat válggaide.

Gáibiduvvo hui olu sámiid njunušolbmos.
– Presideanta ferte leat gearggus dálkkiin bissut ceaggut go sámi áššiin bargá, ja sus fertejit jođihanattáldagat go galgá min jođihit oadjebasat boahtteáigái. Dása heive Silje hui bures, go son lea moanat dálkkiid vásihan barggadettiin Sámi ovdánahttimii, dadjá Myrnes Balto.

Rápmi “hoavddas”

NSR-jođiheaddji doarju maid son guhte buot buoremusat diehtá mii gáibiduvvo presideantan. Aili Keskitalo leamaš oktiibuot ovcci jagi presideantan ja lea dainna dat guhte lea guhkimus leamaš presideanta Sámedikkis. Ja son maid rámiida iežas maŋisboahtti, NSR:a boahtte presideanttaevttohasa.

Son lea hui čeahppi, sus lea buolli dáhttu Sámi ovddas bargat, son movttiidahttá, son lea mearrediđolaš ja doaimmalaš.

– Mun lean beassan Siljen ovttasbargat máŋggaid jagiid. Son lea hui čeahppi, sus lea buolli dáhttu Sámi ovddas bargat, son movttiidahttá, son lea mearrediđolaš ja doaimmalaš. Go sus leamaš ovddasvástádus olu ja stuorra áššesurggiin, nu mo guolásteami, boazodoallu ja areálaáššiin, de lea sus olu vásáhus jo mo sáhttá fallehuvvot fámolaš bealálaččain sihke politihkas  ja industriija bealis, dadjá Keskitalo. 

– Ná han mii diehtit ge ahte son lea nanus ja duostil, lasiha NSR-jođiheaddji Myrnes Balto.

Mearrasámi nisu Unjárggas eret

Silje lea Unjárggas eret ja dovdá bures makkár vuođu mearrasámi kultuvra gáibida. – Guolástus, veahá eanadoallu bohkosat ja juonat, leaikkastallá Silje go čilgesta mii mearrasámi kultuvra lea. 

– Olmmoš fertii váldit atnui dan maid sáhtii go galggai birget dálkkiin ja buollašis. Jurddaš go ain vuhttojit duháhiid jagiid boares luottat min máttuid eallimiin Ceavccageađggis! Dat lea erenoamáš, jurddaš makkár olbmot dat leat leamaš, dadjá presideantaevttohas.

Mun jáhkán boahtteáigái mas Sápmi eallá.

Easkka go veahá stuorrulii ja rávisolmmožin Silje duođas oahppagođii sámegiela. – Munnje lea sámegiella okta dain deháleamos áššiin man ovdii mii sáhttit bargat. Mun dieđán man váttis dat lea, muhto mun dieđán maid ahte lea sihke vejolaš ja dehálaš váldit giela ruovttoluotta, dadjá Silje.

Jáhkku boahtteáigái

– Mun jáhkán boahtteáigái mas Sápmi eallá. Mas gielat ja kultuvra ahtanuššet ja mas mis leat sihke barggut, ássanbáikkit ja astoáiggedoaimmat. Mun jáhkán mis dalle lea Sápmi gos mii fuobmát ođđa doaimmaid, seammás go áimmahuššat sihke eatnamiid ja čáziid, ealáhusaideamet ja árbevieruideamet.

– Dán dihtii mun politihkken, ja mus lea nanu jáhkku iežamet čovdosiidda, loahpaha presideantaevttohas čielgasit.