Juovladearvvuođat NSR-jođiheaddjiin

Ráhkis NSR-miellahtut,

Dál álget juovlabasit ja mii mearkkašit erenoamáš áibbašeami juovlaráfái. 2020 leamaš hástaleaddji jahki olles máilbmái go máilmmiviidosaš pandemiija lea leavvan. Dat váikkuha maiddái min dáppe Sámis.

Muhtumat leat ráhkkásiid massán. Moanat bargobáikkiin ja fitnodagain rahčet, ja mis váilu dál iežamet sámi sosiála ja kultuvrralaš infrastruktuvra. Min olbmot boazodoalus leat rahčan duppaliid – sihke pandemiijain ja guohtunheahtediliin dainna olu muohttagiin mannan dálvvi.

“Maŋŋil goavvegiđa boahtá buorre geassi” dajahallojuvvo NSR-luođis man Ánte Mihkkal Gaup lea bidjan. Dát leat buorit ja jeđđejeaddji dajahusat dál go 2020 rievdá 2021`ain. Nohkkoset lossa áiggit ja 2021 šaddos buorrin.

Mii leat jo álggahan 2021 mearridemiin sámediggebušeahta mas olu buorit ođđasat sámi mánáide ja nuoraide, sámi gielaide ja min áŋggirdeddjiide geat miehtá doaimmahit sámi kultuvrra- ja giellaguovddážiid. NSR lea čájehan ahte mii nannet ja ovdánahttit Sámi dan oktasaš ovttasbarggu bokte mii mis lea Sámedikkis.

2021`s mii áigut, lassin dehálaš kulturbargguide maid sámeservviid bokte bargat, bivdit ođđa luohttámuša Sámi álbmogis. Ođđa presideanttaevttohusain ja ođđa áŋgiris politihkain mii ráhkkanit fas válggaide.

Mii šaddat giitit iežamet ráhkis sámediggepresideantta Áili Keskitalo boahtte jagi, muhto mis lea ain 10 mánu báhcán su jođihemiin ja mii buohkat illudit beassat gullat su maŋimuš ođđajagisártni ođđajagimánu 1. beaivvi.

Muhto álggos mii návddašit juovlaráfi man mii leat vuorddašan.

Buorit juovllat ja buori ođđa jagi!

Dearvuođaiguin

Runar Myrnes Balto, jođiheaddji

Saia Stueng, organisatoralaš 2. jođiheaddji

Vidar Andersen, politihkalaš 2. jođiheaddji