Ii Muolkkuid-elektrifiseren – Jo gearggusvuhtii

Finnmárkkus čavgá dál biegga, go leat plánejuvvojit luonddubilideamit mat leat stuorát go goassige ovdal.

Olles davvi-norgga álbmoga oaivila vuostá lea ráđđehus mearridan elektrifiseret gássabuvttadeami Muolkkuin.

Olbmot leat elektrifiserema vuostá, go dat ballet ahte dat sihke njammá buot elfámu mii leš guovllus, go lokte elfápmohattiid ja go duoddariidda ja váriide devdet bieggaturbiinnaid.

– Sámediggeráđđi válljii áššáskuhttit stáhta go ráđđehus mearridii elektrifiseret. Go dát mearrádus ii leat váikkuhusguorahallojuvvon ja eai ge leamaš konsultašuvnnat Sámedikkiin, dadjá sámediggepresideanta Silje Karine Muotka. 

Riektevuogádatbálggis orro dál báhcán okta dain áidna vejolašvuođain bissehit elektrifiserema.

Sámedikkis lea NSR áidna dáhkádus ahte álggahuvvon riekteproseassa ii bissehuvvo.

– Sii geat vuostálastet min dán áššis čiehkádit ráđđehusa mearrádusa duohkái. Mii leat áidna molssaeaktu dáin válggain geat dáhttut buot reaidduid geahččalit, bissehan dihtii dán. NSR lea álbmoga beali, ja mii eat vuollán, dadjá Muotka.

NSR lea starga vuostefápmu goarideaddji industriijaáigumušaide sámi guovlluin.

– Mis leat čielga plánat bargosajiid háhkamii, muhto mii eat dohkket ovdáneami mii bilida iežamet boahtteáiggi. Go deaividat politihkain mii doahttala bilideaddji industriija dárbbuid ovdal min, de lea min bargu dáistalit sihke luonddu ja álbmoga beali, muitala Paul Bendik Jåma, vuosttaševttohas Lulli-Sámi válgabiirres.

Jåma, guđes lea duogáš sihke suodjalusas, politiijas ja dearvvašvuođasuorggis, oaidná sámepolitihka gearggusvuođageahčastagain.   

– Olles Norgga gearggusvuođa dáfus de ii leat jierpmálaš vuodjit politihka mii goarida sámi ealáhusaid. Dat buvttadit biepmu ja dain lea gelbbolašvuohta mat leat áibbas dehálačča jus šaddá heahtedilli. Mii dáhttut NSR:s geahččalit sihkkarastit ahte mii atnot dehálaš oassin ollislaš-gearggusvuođas, dadjá Jåma.

Presideantaevttohas Muotka oaivvilda ahte válggat Čakčamánu 8. beaivvi šaddet mearrideaddjin:

– Jienas NSR jus dáhtut Sámedikki mii ain váldá sámiid vuoigatvuođaid, suvdinnávccalaš ávkkástallama luondduin ja gearggusvuođa duođas. Mii áicat ahte min vuostálastit eanet ja eanet loktejit industriija dárbbuid ovddabeallai iežamet. Danne lea dát válga mii sáhttá mearridit iežamet boahtteáiggi, dadjá Muotka.