Buorit válgabohtosat NSR:ii!

Dál leat 87% jienain lohkkon, ja orruleamen ahte 31,4% jienasteddjiin jienastedje NSR (2017:s lei 32,3% go rehkenastá dalá NSR/SáB oktasašlisttu Nuortaguovllu válgabiirres). NSRa presideantaevttohas Silje Karine Muotka lea sihke rámis ja vuollegaš go jienasteaddjit leat dákkár luohttámuša addán.

– Jienasteaddjit leat dorjon dan čielga politihka man NSR lea vuodján Sámedikkis dáin vássán jagiin. Sii dáhttot čielga ja nanu Sámedikki, ja dát eastada daid fámuid mat háliidit njeaidit min sajádaga servodagas, ja min vejolašvuođaid gullot, dadjá Muotka.

Mii galgat hálddašit dán luohttámuša buoremussan Sápmái

– Mii galgat hálddašit dán luohttámuša buoremussan Sápmái, ja mii dáhttut joatkit áŋgiruššat sámegiela ja kultuvrra loktemiin, ja hukset ja ovdánahttit sámi báikegottiid. Mun anán árvvus dan luohttámuša man jienasteaddjit lea addán, ja mat jienaideaset bokte leat čájehan ahte dáhttot njeallje ođđa jagi buriin NSR-politihkain, joatká Muotka.

Guhkes válgagižžu orro buktán bohtosiid NSR:ii ja Muotkai.

– Mii leat mátkkoštan ja deaivvadan olbmuiguin miehtá Sámi. Mii leat gullan olbmuid hástalusaid miehtá riikka, ja muitalan iežamet čovdosiid birra. Mun lean rámis dan barggus man buot min evttohasat ja eaktodáhtolaččat leat bargan NSR ovddas dán válgagiččus, ja mun illudan bargagoahtit Sámedikkis ovttas iežamet čeahpes politihkkáriin. Dál álgá bargu, dadjá Muotka.

Mun lean rámis dan barggus man buot min evttohasat ja eaktodáhtolaččat leat bargan NSR ovddas dán válgagiččus

NSR bovde lagamus beivviid eará Sámediggebellodagaid ságastallamiidda mas ulbmil lea ovttasbarggu cegget.

– Mii háliidat fátmmasteaddji ja starga ovttasbarggu Sámedikkis. Mis lea buorre hárjáneapmi ovttasbargat, ja mun lean sihkar ahte mii nagodat ráhkadit ovttasbargojulggaštusa mainna sihke mii, ovttasbargoguoimmit ja sámi álbmot sáhttá leat duđavaš, loahpaha Muotka.