NSR-N sárdni NSR riikkačoahkkimii

Govven: NSR / Sveinung Eide Hansen

Les norsk oversettelse her

Ráhkis NSR riikačoahkkin,

Mun lean Hánás Johanas Waldermar Jovnna Elle Márgget. Mun lean Kárášjogas eret, ja mun lean NSR Nuoraid jođiheaddji.

Lea vuosttaš geardde mis NSR Nuoratis leamašan riikačoahkkimis 5 delegahta jienastanrievttiin, ja háliidan giitit ahte riikačoahkkin dohkkehii dan. Mu mielas lea dehálaš ahte nuorat leat sajis doppe gos mearrádusat dahkkojuvvojit. Go mearrádusat mat váldojuvvojit NSR riikačoahkkimis guoská maid nuoraide, ja dat čájeha ahte mii maid gullat dán searvevuhtii. 

Muittán vuosttašgeardde mun serven NSR riikačoahkkimiid de mun oahppásmuvven ollu sámi nuoraiguin, gean mun in goassige livčče muđuid deaivan, ja otne dát nuorat leat mu buoremus bargoskihpárat. 

Mu vuosttaš riikačoahkkima rájes lean mun háliidan bargat sámi nuoraid ovddas. 

Sámi nuorat leat mu stuorámus inspirašuvdna.

Sámi nuorat leat agi áigge čužžon ovddamušas sámi lihkadusas. 
Ollusat geat čohkkájit dán lanjas juste dál, álge NSR Nuoraid stivrras ja geat dál čohkkájit sámi alimus posišuvnnaiguin. 

Muhtimat dán lanjas ledje mielde vuođđudeamen NSR Nuoraid seamma jagi go Sámediggi Norggabeal rahppui. 

Ollusat dán lanjas leamašan mielde miellačájehemiiguin sámi rivttiid ovddas.
Ja mun lean rámis dan ovddas ahte nuorat dustet ja dahket dan mii ferte dahkkot, ja doaivvun sámi nuorat jotket dainna. 


Ferten muittuhit NSR Nuoraid ále eahpit iežas attáldagaid ja sámevuođa.

Muitte ahte lea sivva manin juste don čohkkát dien posišuvnnas, ámmáhis dahje stivrras. Du jietna galgá gullot ja vuhtiiváldojuvvot. 

Danin háliidan maid deattuhit man dehálaš nuoraid deaivvadanbáikkit leat. Mis lea áiddo leamašan nuoraiddeaivvadeapmi Njávdámis, ja min vuosttaš NSR Nuoraid riikačoahkkin. Mii leat maid oasálastan Gávnnadeamis ohcejogas, maid Sámiráđđi lágidii ovttas miellahttu organisašuvnnaiguin. 

Doalut mat čohkkejit nuoraid lea eanet go doalut. Doppe mii oahppásmuvvat guhtet guimmiideametguin. 

Ja kánske dat buot deháleamos: diekkár deaivvadanbáikkiin olmmoš ii dovdda alcces okto áššiiguin. 

Dat mii lea nu fiinnis dákkár lanjain lea ahte doppe lea sadji sámástit, ja arvvus atnit sámegielaid. Cealkit mii dehálaš midjiide min iežamet premissaid mielde, go gieđahállojuvvojit politihkalaš áššit mat gusket midjiide. 

Nuoraiddeaivvademiin mis lea oktasašvuođa ja searvevuohta. 
Ja doppe mii gávnnhat maid mii háliidat ollášuhttit. 

Geassit leimmet mii ohcejogas Gávnnadeapmi 3 cealkámušain bargamin. Doppe mii deattuheimmet man dehálaš lea nannet ovttasbarggu olles sámis, vai mii sáhttit ovttas hápmet oktasaš sámi riektevuođu ja sámi oahppuplána. 

Mis leat dieđusge stuorra áigumušat. Muhto dát leat áššit mat leat dehálačča nuoraide sámis. Dát áššit bidjet vuođu movt mii oahppat ja geavahat giela. Movt mii galgat sáhttit  sámi eallima eallit sámis, beroškeahttá stáda riikarájáiguin. 

Min áigumuš lea ahte sápmelaččain leat vuoigatvuohta eatnamiidda ja čáziide vai mis lea boahtte áigi sámi eallinvugiin eallit. 

Mii nuorat mii leat boahtte áigi, muhto maiddái dálá áigi. 

Mii leat giitevačča ahte mii leat fátmmastuvvon. Mii oažžut leamen mielde. 

Mis lea bistevaš sadji NSR riikastivrras. 

Nuorat leat sámi servviid stivrraiguin. 

Mis leat nuorra sámedikke áirasat. 

Nuorat leat leamašan mielde sámedikkeválggaid nominašuvdnaprosessain. 

Ja otne mii čuožžut dás vihtta delegahtain, daid seamma demokráhtálaš rivttiiguin go eará delegahtat riikačoahkkimis. 

Lea dehálaš lávki ovddos guvlui. 

Ja mii doaivut ahte dát ii leat loahppa dan ovdáneamis, muhto dušše álgu gos nuorat fátmmastuvvojit NSR’as. 

Go nuorat ožžot saji de ii leat nuoraid jietna dušše sihkkarastojuvvon báhpára ala. Muhto mii oažžut lassi vásáhusaid, oainnuid ja jurdagiid. 

Dan lahkai mii hukset Sámi servvodaga mii lea stárggas ja nanus. 

Háliidan loahppasániiguin giitit riikačoahkkima. 

Giitu ahte mii oažžut leat mielde.

Mielde hápmet politihka.

Mielde váldit ovddasvástádusa.

Mielde hukset sámi, sámi mánáide, gos sámi árvvut, árbevierut, rievttit ja sámieallin lieđđu min iežamet premissaid ja áigumušaid mielde. 

Mii illudat leamen oassin barggus! Giitu.