Vidar Andersen lea válljejuvvon NSR jođiheaddjin sadjásaččat

NSR riikkastivra lea 24.10.2021 válljen Vidar Andersen NSR jođiheaddjin sadjásaččat.

Kategori
NSR-davvi
Forfatter
NSR
Dato
25.10.2021
NSR-davvi

Vidar Andersen lea válljejuvvon NSR jođiheaddjin sadjásaččat

Runar Myrnes Balto dieđihii Golggotmánu 24. beaivvi Norgga Sámiid Riikkasearvvi (NSR) stivrii ahte luohpá jođiheaddjin searvvis. Sivva lei go golggotmánu 21. beaivvi nammaduvvoi Sámediggeráđđelahttun. Myrnes Balto leamaš jođiheaddji 2018 rájes.

– Munnje leamaš stuorra gudni beassat jođihit dan stuorámus sámi kulturpolitihkalaš searvvi norgga bealde. Leamaš golbma mávssolaš jagi mas leat bargan olu dehálaš sámi áššiin, ja mun lean giitevaš go ožžon luohttámuša organisašuvnnas, dadjá luohpan jođiheaddji Runar Myrnes Balto.

Riikkastivra lea válljen 2. nubbijođiheaddji Vidar Andersena jođihit searvvi boahtte riikkačoahkkima rádjai. Andersen leamaš politihkalaš nubbijođiheaddji searvvis 2018 rájes.

– Álggos háliidan giitit Runar Myrnes Balto buot dan barggus maid lea NSR ovddas bargan, ja mun sávan sutnje lihku ráđđelahttun. Lean giitevaš go munnje addo luohttámuš doaibmat NSR jođiheaddjin dán áiggis ovdal riikkačoahkkima mii galgá boahtte jagi, ja mun illudan álgit bargat buot daiguin áššiiguin mat čuvvot.

NSR njuolggadusaid vuođul de jerrui 1. nubbijođiheaddji Saia Stueng álggos.

– Mun válljejin čujuhit Vidar Andersenii, go mun lean okto guvttiin smávvamánáin ja ii leat justa dál vejolašvuohta váldit dákkár ámmáha. Lihkus lea Vidar hirbmat čeahppi, ja mus lea buorre jáhkku ahte son njuovžilit jođiha NSR, dadjá Saia Stueng.