Ođđa joavkoráđđeaddi

NSR lea virgádan Elle Mári Dunfjell Oskala (27) NSR Sámediggejoavkku ráđđeaddin. Elle Mári galgá maid doaibmat čállin NSR parlamentáralaš jođihangottis. 



Elle Mári Dunfjell Oskal lea Guovdageainnus eret. Sus lea servodatplánen ja kulturipmardus bachelor UiT bokte ja liigeoahppu praktihkalaš prošeaktajođiheamis. Son lea maŋemus golbma jagi bargan Guovdageainnu Sámi beassášmárkaniid festiválabuvttadeaddjin ja Sámi musihkkafestivála beaivváláš jođiheaddjin. Son bargá maid freelance jorgaleaddjin ja kulturbargin. 

Elle Mári lea Guovdageainnu sámiid searvvi jođiheaddji ja lea NSR miellahttun leamaš nu guhká go oba muitá ge. Son lea maiddái Guovdageainnu Sámilisttu njunuš ja lea válljejuvvon Guovdageainnu suohkanstivrii. 

– Lean álo beroštan sámegielas ja sámi servodatdillis, ja maŋemus áiggi lean eambbo áŋgiruššan politihkalaččat maiddái. Illudan bargat NSR joavkoráđđeaddin, ja illudan beassan leat mielde hábmeme ja ovddideame NSR politihka viidáseappot, dadjá Elle Mári.

Elle Mári Dunfjell Oskal lea virgáduvvon 50% virgái. 

Gulahallandieđut

Beaska Niillas, Parlamentáralaš jođiheaddji: beaska@nsr.no/ 918 56 318

Elle Mári Dunfjell Oskal, NSR Sámediggejoavkku ráđđeaddi: ellemari@nsr.no / 932 29 494