Čálli virgáduvvon Norgga Sámiid riikkasearvvi čállingoddái

Ánton Biehttár Hauan lea Romssas eret ja lea bargan Natur ja ungdom,
fylkajođiheaddjin Naturvernforbundas. Son lea maiddái bargan iešguđetge
festiválain nu mo Riddu Riđđu, Beassášfestiválas Guovdageainnus, Bukta ja
Øyafestiválas. Dasa lassin lea son doaibman Romssa sámi searvvi stivrras 2018
rájes.

– Mun beroštan servodagas ja kultureallimis, ja erenoamážiid min sámi
kultuvrras. Danin lea hui buorre munnje dál go beasan bargat dan stuorimus sámi
organisašuvnnas mii lea Norgga bealde Sámis, lohká Hauan.

Hauan lea maid studeanta Sámi Allaskuvllas gos lohká sámegiela.

– Mii leat hui iluin go leat beasan virgádit nu áŋgiris ja čeahpes bargi
geas maiddái nu nanu gelbbolašvuohta, dadjá Beatrice Iren Fløystad, NSR
jođiheaddji.

NSR ođđa čálli Ánton Biehttár Hauan Guovdageainnus ja jođiheaddji Fløystad
Vuolle Sohpparis Ruoŧabeal sámis orruba dušše 20 beanagullama eret nuppiid ja dat buktá buori máđolašvuođaid deaivvadit.

– Mii sávvat Ánton Biehttárii bures boahtima ja dál viimmat lea buorre go mii leat eanet olbmot bargamen min dehálaš áššiiguin sámeálbmoga ovddas, loahpaha
Fløystad.

Ánton Biehttár Hauan doaibmá
čállin 50% geasi rádjái.