Sosiálapolitihkka maid ovttasbargošiehtadusain

Čálli: Anja Thonhaugen, Davveguovllu válgabiire

Čoahkkinjođiheaddji,

Biebmohattiid, boaldámuša ja energiija haddelassáneapmi čuohcá garrasit ekonomalaččat ovttaskasolbmuide, maiddái sámi guovlluin. Buot dát áššit dagahit balu ahte geafivuohta stuorru sámi guovlluin. Guokteduhátčiežanuppelogis(2017) gulaimet ahte juohke viđat mánná eallá geafivuođas Guovdageainnus, guokteduhátgávccinuppelogis(2018) gulaimet ahte Unjárggas lea sullii vihttanuppelot(15) proseantta(%) mánáidgeafivuohta, ja seamma jagi gulaimet ahte Kárášjogas lea guoktenuppelot(12) proseanta(%) mánáidgeafivuohta.

Mu millii čuohcá dát hui garrasit.

Sámedikki sosiálapolitihkas dárbbašuvvo ovdánahttin ja laktit dan vel ovttasbargošiehtadusaide.

Sámedikki šiehtadallamiid oktavuođas guokteduhátguoktelogiguovtti(2022) čavčča Álttá suohkaniin ovttasbargošiehtadusaid ođasmahttima birra, bivdá Sámediggi ásahit ođđa čuoggá mii guoská mánáidgeafivuhtii ja sosiála bargui. Sámediggi ja Álttá suohkan sáhttiba ovttas váikkuhit dasa ahte Álttá biebmostašuvnna fálaldat biebmobázahusaiguin viiddiduvvo.

Oallugiin lea dárbu atnit Álttá biebmostašuvnna fálaldaga ja sii dieđihit maid ahte dárbu lea lassánan maŋemus jagiid. Álttá biebmostašuvdna lea maid álggahan ovttasbarggu Guovdageainnu Eaktodáhtolašguovddážiin nu ahte duos dás lea fálaldat Guovdageainnus, ja sii háliidivčče maid viiddidit fálaldaga eambbo suohkaniidda. Sámediggi ja Álttá suohkan sáhttiba ovttasráđiid veahkehit dan barggus.