Sámi klinihka dárbbaha sierra stivrra ja bušeahta dál

Dán vahkku meannuda Sámedikki dievasčoahkkin ášši Sámi spesialistadearvvašvuođabálvalusat – Sámi klinihka organiseren. NSR mielas lea dárbbašlaš ahte Sámi klinihkka organiserejuvvo alit dásis, nugo Davvi Dearvvašvuohta GDF, gos sii ožžot sierra stivrra ja bušeahta.

– Lea hoahppu ođđasitorganiseret Sámi klinihka. Sierra stivrrain ja bušeahtain beassá Sámi klinihkka ieš vuoruhit ja ovdánahttit doaimmahusa, iežaset vuoruhemiiguin, dadja Helén Storelv-Rabone, NSRs miellahttu bajásšaddan-, fuolahus- ja oahppolávdegoddi.

Sierra stivrrain ja bušeahtain beassá Sámi klinihkka ieš vuoruhit ja ovdánahttit doaimmahusa

Ášši lea dievasčoahkkinášši 28/20 Sámi spesialistadearvvašvuođabálvalusaid ovddideapmi boahtteáiggis čuovvuleapmi. Mearrádusas dadjo ahte sámi spesialistadearvvašvuođabálvalusa otná organiseren ii deavdde sámiid rievtti álgoálbmogin, nugo iešmearridanvuoigatvuohta dearvvašvuođabálvalusaid plánemii, hábmemii ja organiseremii. Dan rájes lea leamaš unnán ovdánahttin sámi spesialistadearvvašvuođabálvalusas. Sihke fágabirrasat ja geavahanjoavkkut leat dieđihan ahte otná organiseren dagaha ahte dearvvasvuođafálaldat vuoruhuvvo vuolemussii ja oažžu heajos ovdánahttima. 

– Áiggi vuollai háliidit iežamet sierra nationála sámi dearvvašvuođadoaimmahaga. Muhto lea hoahppu ođđasitorganiseret dál juo. Mis leat sámi pasieanttat ja geavahanjoavkkut olles riikkas, geain lea vuoigatvuohta oažžut ovttadássásaš dearvvasvuođafálaldaga. Ja go deaivvadit dearvvasvuođalágádusain galget beassat eatnigielain čilget dárbbuid ja vuostáiváldot dearvvasvuođabargiin geain maid lea sámi kulturipmárdus, loahpaha Helén Storelv-Rabone.

Govven Helén Storelv-Rabone: Árvu/Sámediggi