Rabas čoahkkin: Duohtavuohta ja soabadeapmi

Bures boahtin rabas čoahkkimii Duohtavuođa- ja soabadankommišuvnna raportta birra!

Raporta, mii ovdonbuktujuvvui Stuoradiggái geassemánu 1. beaivvi, čájeha makkár váikkuhusat dáruiduhttinpolitihkas leat earret eará sápmelaččaide, ja bidjá ovdan doaibmabijuid mat galggašii dahkat ahte sápmelaččat ja stáhta sáhttet soabadit.

Mánnodaga 9.b. golggotmánus, dii. 18:00 – 20:30.
Diehtosiiddas, Njárggadat lanjas

Liv Inger Somby, kommišuvdnamiellahttu, čilge raportta sisdoalu. Maŋŋel ovdanbuktima lea rabas ságastallan raportta sisdoalu birra ja evttohuvvon doaibmabijuid birra.

Guovdageainnu sámiid searvi (GSS) lágiida čoahkkima. Mii sávvat oallugiid searvat čoahkkimii gullan dihte mii raporttas lea ja searvat ságastallamii dasa makkár vuordámušat Guovdageainnu álbmogis leat evttohuvvon doaibmabijuide.

Lea hirbmat dehálaš ahte Guovdageainnus hupmat Duohtavuođa- ja soabadankommišuvnna raportta birra, go dáppe lea maid dáruiduhttin garrasit čuohcan, dadja Elle Mari Dunfjell Oskal, GSS jođiheaddji.

Oallugiin leat vásáhusat dáruiduhttimis, sihke ovdalaš áiggi ja maiddái otná beaivvi, ja danne bovdet buot agi olbmuid searvat. Mii ságastallat dan birra mii boahtá raporttas ovdan, ja mii lea boahtte lávki. Leat go mii gergosat soabadišgoahit obanassiige? Vai lea go dárbu vel eambbo fuomášumi bidjat dasa mii lea geavvan, ain geavvá, ja váikkuhusat mat leat?

Sávvat buohkaide bures boahtin. It dárbbat leat miellahttu.

Čoahkkin dulkojuvvo sámegielas dárogillii. Guossohuvvo gáffe ja herskot.

Duogáš:

Sámediggeráđđi bovde sámi servodaga searvat gulaskuddamii ja buktit oaiviliid raportta sisdoalu birra ja evttohuvvon doaibmabijuid birra. Báikkálaš máhcahagaid ja digaštallamiid vuođul áigu Guovdageainnu sámiid searvi buktit gulaskuddancealkámuša Sámediggái. Áigemearri buktit cealkámušaid lea golggotmánu 31. beaivvi.

FUOM! Mii eat sitere ovttage čoahkkimis.

Jus it sáhte searvat čoahkkimii, muhto aŋkke háliidat buktit máhcahagaid, sáhtát daid sáddet maren@nsr.no.