Rittus lea heahtti – dál dárbbašuvvo ođđa guolástuspolitihkka

Rittus lea heahtti. Mearrasámi guovlluin šaddet gearjidit go stáhta guolástuspolitihkka lea geigen eriid stuorrakapitálii.

NSR:ii lea diehttelas ášši ahte guolli gullá álbmogii mii dáppe ássá.

– Mearrasápmelaččaid ja riddoálbmoga bivdovuoigatvuođat fertejit nannejuvvot lága bokte. Dát šaddá min boahtte stuorra vuoigatvuođagižžu, dadjá Jon-Christer Mudenia, 1. evttohas Nuortaguovllu válgabiirres. 

Otná guolástuspolitihkas leat vuđolaš boasttuvuođat. Eanet ja eanet oamastus bivdovuoigatvuođaide leat dađistaga čohkkejuvvon unnit ja unnit olbmuide. Feastonuohttebivdit ožžo oktii áiggis nuvttá eriid, go galgá buktit sállaša gáddái báikkálaččat. Dál eai šat dárbbaš dan dahkat, ja sii leat ožžon eriid agibeaivái. Boađus lea ahte guolleoastit ja guollereidenfabrihkat báhcet guorosgieđaid. Bargosajit jávket ja báikegottit goariduvvojit.

– Vearrámus lea ahte stáhta dán dahká rabasčalmmiid. Riggodagat mat bohtet guolástusain galggašii baicca ovdánahttit ja nannet riddoguovlluid, iige deavdit millárdeajaid lupmaid. Mii diehtit ahte ođđa guolástuspolitihkka sáhttá viehka olu bargosajiid buktit Sápmái, ja danne mii dáhttut dán divvut, dadjá Mudenia.

NSR lea maŋimuš njeallje jagi dorjon 73 bivdofanasoastimiid ja máŋggaid káijaid.

– Dát lea mearrasámi politihkka mas stuorra mearkkašupmi. Sámedikki doarjja fuolaha ahte nuorra bivdit besset alcceseaset háhkat fatnasa ja álgit bivdit, ja dás lea stuorra mearkkašupmi mearrasámi báikegottiide, dadjá Andreas Vangseng Becken, 3. evttohas Ávjovári válgabiirres. 

Sámedikki doarjja lea ovdamearka mo sáhttá buori mearrasámi politihka dahkat, muhto leat ain hirbmat stuorra dárbbut. Danne gáibida NSR ja earát ge, ahte earit galget máhcahuvvot feastonuohttefatnasiiguin báikkálaš guolásteddjiide, ja ahte guolleoastinbáikkit ja fuolahankáijat fas huksejuvvojit sámi guovlluide 

– Dát lea áidna vuohki mo guolásteaddjit sáhttet beassat báikkálaččat vuovdit sállašiid, ja mo riggodagat báhcet mearrasámi guovlluide, dadjá Vangseng Becken.

NSR ja Sámediggi čujuha maid dasa ahte dát lea eanet go ekonomiija. Dás lea sáhka vuoigatvuhtii iežas kultuvrii, gillii ja ealáhussii.

– Mii leat dál divvunproseassas maŋŋá dáruiduhttinpolitihka. Jus mearrasápmelaččaid bivdovuoigatvuođat eai doahttaluvvo, de lea váttis makkárge albma seanadeami birra hállat, dadjá Mudenia loahpas.