Gonagaslaš Majestehta Harald V (1937–2026)

Gonagas Harald lei gonagas olles Norgii. Son lei maid gonagas sámi álbmogii Norggas. Dan son čájehii sihke sániid ja daguid bokte, olles iežas ráđđenáigodaga.

Go Gonagas Harald rabai Sámedikki Golggotmánu 7. beaivvi 1997:s, de sártnui sániid mat agibeaivái leat darvánan sámiid historjái.

«Norgga stáhta lea vuođđuduvvon guovtti álbmoga territoriai, dážaid ja sámiid. Sámi historjá lea čavgadit bárgiduvvon oktii norgga historjjáin. Otne mii fertet šállošit dan vearrivuođa man norgga stáhta ovdal lea dahkan sámi álbmogii garra dáruiduhttinpolitihka bokte.»

Dát lei vuosttaš geardi stáhta ovddasteaddji almmolaččat šállošii dáruiduhttima vearrivuođa. Dovddasteapmi ahte Norga lea vuođđuduvvon guovtti álbmoga territoriai leamaš dan rájes erenoamáš dáhpáhus stáhta ja sámi álbmoga gaskavuođas. Olu sámiide ledje dat sánit dehálaš doahttaleapmi dain vásáhusain mat guhká ledje jávohuhttojuvvon.

Gonagas čuovvulii sániidis oskkáldasat iežas searvama bokte. Son rabai Sámedikki máŋggaid jagiid, ja son lei sajis go Sámedikki ođđa viessu rahppui Kárášjogas jagi 2000. Son searvvai Tråante 2017:s, go lei čuohtejagiávvudeapmi vuosttaš sámiid riikkačoahkkimis Tråantes. Go deaivvadii sámi birrasiin de čájehii duohta beroštumi, liekkusvuođa ja gudnejahttima. Sámi mánát, nuorat ja vuorrasat deive gonagasa guhte oinnii sin.

Sámi álbmoga ja gonagasgotti gaskavuohta lea máŋgačuohte jagi boaris. Jagiid mielde leat moanat sámit gulahallan njuolga gonagasain dehálaš áššiin. Maiddái Gonagas Haralda áigge leamaš dát gaskavuohta oidnosis. Go sámi nuorat 2023 čavčča bivde audienssa Fovse-ášši oktavuođas, de rabai Gonagas Harald šloahta uvssaid. Máŋgasiidda šattai dát nanu čalmmustahttin Gonagas Haralda rabasvuođas ja dáhtus sihke deaivat ja guldalit sámi jienaid.

Norgga Sámiid Riikkasearvi giitá Gonagas Haralda su áŋgirvuođas gonagasriikka ja sámi álbmoga ovddas. Su doahttaleapmi sámiide álbmogin, ja su dáhttu buoridit ovddeš vearrivuođaid lea ráhkadan bistevaš bálgáid. Bargu sámi gielain, kultuvrrain ja servodagain lea dál nannosit go lei.

Ráfi lehkos Gonagas Harald V muitui.

Báhtsus ráfe Gånågis Haralda mujttuj (julev).

Mijjieh raeffiem tjoevkejibie Gångkan Harald V mojhtesen åvteste (åarjel).

Vi lyser fred over Kong Harald Vs minne.