Don galggat oažžut ollislaš čuovvoleami

– Dáppe Hámmerfeasttas ii leat sámi skuvlla- dahje mánáidgárdefálaldat, ja mis váilu sámi deaivvadanbáiki. Dát lea hehttehussan go galgat máhcahit iežamet sámi identitehta ja kultuvrra, dadjá Hanne Marion Gaup, guhte lea goalmmátevttohas Davveguovllu válgabiirres. 

Hámmerfeasta ii leat áidna mas dákkár hástalusat. Dáruiduhttinpolitihkka lea mielddisbuktán ahte olu sámiin, sihke davvin ja lullin, váilu sámi fálaldat iežaset guovlluin. Dát leat muhtun bealit mat fertejit divvojuvvot maŋŋá dáruiduhttima. 

Amalie Hansen Kristiansen Raste lea Sálliris eret, 22 jahkásaš, ja goalmmátevttohas Gáisi válgabiirres. Son lea oassin ođđa buolvvas mii váldá ruovttoluotta iežas mearrasámi rámisvuođa.

– Mus lea buolli áŋgiruššan ahte mearrasámi nuoraide mat leat lávkemin sámi servodahkii, gávdno fátmmasteaddji biras mii doarju sin čuođi proseantta. Mun searvvan válggaide NSR ovddas go mii háliidit ahte buohkat geat dáhttot váldit ruovttoluotta giela dahje kultuvrra galget oažžut ollislaš doarjaga, dadjá Raste.

NSR oaivvilda ahte Sámediggi galgá váldit iežas ovddasvástádusa. 

Danne mii leat ráhkadišgoahtán báikkálaš plánaid buot válgabiirriide. Sámediggi galgá fuolahit ahte šaddet eanet deaivvadanbáikkit, giellaguovddážat ja kulturásahusat dáruiduvvan guovlluide. Muhto eiseválddiin lea aŋkke dehálaš čoavdda.

– Sámit fertejit beassat cegget gáibádusaid sihke stáhtii ja gielddaide mas ásset. Unnimusat gal ferte fuolahuvvot vejolašvuohta beassat sámi mánáidgárdái ja oažžut sámegieloahpahusa skuvllas. Sámegieloahpahus gal lea vel láhkageatnegahttojuvvon, ja lea áddemeahttun ahte olu mánáin ii leat dát fálaldat, dadjá Hanne Marion Gaup áŋgirit. 

Ruovttus Hámmerfeasttas gal lea Gaup ieš dohppen divodanbarggu. Rávisolmmožin oahpai gávttiid goarrut. Dál niegada deaivvadanbáikkis mii livččii sihke giella- ja kulturarena, ja vel duodjebáikkis gos sápmelaččat sáhttet deaivvadit ja goarrut ovttas. 

– Dát lea niehku man jáhkán sáhttá duohtandahkkojuvvot NSR politihkain. NSR:as lea guhkes historjá dákkár vejolašvuođaid ráhkadit, ja dál mii háliidit maiddái Hámmerfestii dan oažžut áigái, ja maiddái eará báikkiide main váilu dákkár fálaldat, son muitala. 

Olahan dihtii dán de dáhttu NSR ovttasbargat vel lagabui gielddaiguin, fylkkaiguin ja báikkálaš servviin. 

– Sámediggi ii sáhte okto jođihit báikkálaš ásahusaid. Muhto ovttas de sáhttit olahit hui olu, muitala Amalie Hansen Kristiansen Raste loahpas.