Evttohasat Lulli-Norggas – garra beroštupmi sihke gielas, kultuvrras ja vuoiggalašvuođas

Nominašuvdnačoahkkimii čoahkkanedje lagabui 30 áŋgiris miellahtu olles válgabires, ja njunuševttohasat ovdanbukte buriid ja čielga cealkámušaid das mainna sii áigot bargat boahtte sámediggeáigodagas. Lulli-Norggas lea dál lassi mandáhta, ja NSR oaivvilda ahte lea vejolaš fidnet njealji áirasa Sámediggái.

Njunuševttohas Aina Madelén Nordsletta Aslaksen lea eret Kárášjogas ja Deanus. Son lea dál joavkoráđđeaddi NSR sámediggejoavkkus ja leamaš Sámedikki Nuoraidpolitihkalaš Lávdegotti (SáNuL) nubbijođiheaddji 2022 rájes.

– Mun ledjen plánen heaitit politihkkemin ja áigon bargat almmolaš suorggis, muhto Fovse-akšuvnnat bohte muittuhussan manin mii dárbbašit sámi jienaid mat dustet dieđihit. Mun ovddastan NSRa danin go mii áimmahuššat ahte buot sámit miehtá riikka guldaluvvojit, eatge dohkket ahte eiseválddit badjelgehččet min vuoigatvuođaid, lohká Aslaksen.

Nubbievttohas Tor Gunnar Nystadas lea nana hárjáneapmi sámediggeáirrasin, ja lea dán áigodagas dievasčoahkkima jođihangotti nubbijođiheaddji ja plána- ja finánsalávdegotti jođiheaddji. Son lea badjel 10 jagi leamaš Oslo Sámiid Searvvi jođiheaddji, ja maŋimuš jagiid leat sis leamaš ollu doaimmat ja lágideamit sámiide Oslo birrasis.

– Dán golmma áigodagas maid lean leamašan Sámedikkis, leat mii ollu olahan Lulli-Norgga ovddas. Lea dehálaš čađahit dakkár doaimmaid mat duođaid doibmet, nugo giellakurssat, deaivvadanbáikkit ja doarjagat servviide. Mun ovddastan NSRa danin go mii ráhkadit ealli sámi birrasiid miehtá riikka, dadjá Nystad.

Goalmmát evttohas Aslak Heika Hætta Bjørn lea oahpes namma Oslo sámi birrasis, ja sus lea ollu áŋgiruššamat organisašuvdnaeallimis. Sus lea nana hárjáneapmi politihkalaš ráđđeaddin Ruksesbellodaga ovddas Stuoradikkis, ja lea maid ovdal leamaš joavkoráđđeaddin NSR sámediggejoavkkus.

– Sápmelaččat galget sáhttit eallit sámi eallima ja doaimmahit kultuvrraset miehtá riikka, ja dan ovddas duođaid áŋgiruššan. Dáppe lulde mearkkaša dat earret eará ahte fertejit leat doaibmi sámi mánáidgárdefálaldagat, ja ahte min mánát ožžot dan giellaoahpahusa skuvllas masa sis lea riekti. Dat mearkkaša maiddái ahte NSR ain galgá leat čielga jietna min árbevirolaš ealáhusaide ja guovlluide, lundui, boazodollui ja riddoguolásteapmái, dadjá Hætta Bjørn.

Njealját evttohas Aili Kirste Strømeng Arntzen lea aktiivvalaš sámi birrasis Oarje-Norggas ja lea bargan dan ovddas ahte sámi giella ja kultuvra lea oidnosis Birgona suohkanis 2013 rájes. Son lea ovdal leamaš várreáirrasin Sámedikkis ja searvá našunálpolitihkii Partiet Sentrum bokte.

– Min sámi identitehta lea dehálaš beroškeahttá gos mii orrut ja geat mii leat. Mii dárbbašit buriid sámi arenaid mánáidgárddis ja viidáseappot buot servvodatsurggiide, maiddái Birgonii ja buot eará gávpogiidda válgabiirres. Mis leat vuoigatvuođat ja dat galget vuhtiiváldot beroškeahttá das lea go gielddas ovttasbargošiehtadus Sámedikkiin vai ii, dadjá Arntzen.

– Dáinna listtuin mii leat nannosat. Mis leat kandidáhtat geain lea garra beroštupmi sihke gielas, kultuvrras ja vuoiggalašvuođas, ja sii dovdet bures maid Lulli-Norgga olbmot duođaid dárbbašit. Mun lean rámis min joavkkus ja jáhkán ahte mii nagodit oažžut njeallje mandáhta. Dál mii illudit deaivvadit jienasteddjiiguin ja áigut bargat dan ovddas ahte vuoitit válggaid, lohká Kirsti Guvsám, gii lea Lulli-Norgga válgabiirestivrra jođiheaddji.

Dá lea NSR listu Lulli-Norgga válgabires:

1. Aina Madelen Nordsletta Aslaksen, 2000, Oslove
2. Tor Gunnar Nystad, 1967, Lillestrøm
3. Aslak Heika Hætta Bjørn, 1992, Oslove
4. Aili Kirste Strømeng Arntzen, 1994, Birgon
5. Camilla Karoline Falle, 1980, Gjerdrum
6. Jan Gunnar Tollefsen Kaino, 1980, Ålesund
7. Hildegunn Bøkevoll-Skjølberg, 1972, Askøy
8. Sveinung Eide Hansen, 1997, Fåberg/Lillehammer
9. Oliver Bjørnstad Ivanowitz, 2002, Oslove
10. Marie Therese Nordsletta Aslaksen, 1979, Rolvsøy/Fredrikstad
11. Benedikte Pryneid Hansen, 1982, Oslove
12. Roger Loen, 1956, Lesja
13. Laila Coldevin, 1967, Frogner/Lillestrøm
14. Kirsti Guvsám, 1979, Kristiansund