Eanet ruhtadeapmi Sámedikkis Romssa-sápmelaččaide

Govva: Sámediggi / Ørjan Marakatt Bertelsen

Romssa suohkan lea mearridan ahte háliidit searvat sámi giellahálddašanguvlui. Sámedikki eanetlohku fástida reála bušeahttalassánemiid bokte Romssa Sámi Vissui ja suohkana giellabargguide, dál go Sámediggi galgá juogadit 50 miljovnna lasseruđa 2025:s.

Dán sámedikkeáigodagas lea Sámediggi ovttas Romssa suohkanin ja Romssa fylkkasuohkanin ásahan Romssa Sámi Viesu man máŋgasat leat vuorddašan.

– NSR bealis lean hui movtta dieđihit ahte mii addit 300.000 lasi fásta doarjaga Sámedikki bušeahta bokte. Dáinna lágiin váldit mii stuorra liigeovddasfástádusa Romssa Sámi Viesu doaimmas. Dan mii dáhkat danin go viessu lea šaddan dehálaš deaivvadanbáikin, dadjá politihkalaš ráđđeaddi sámediggeráđđái Sandra Márjá West, gii maid lea Romssa Sámi Searvvi jođiheaddji.

Romssa suohkan eaiggáda Gáisi giellaguovddáža. Sámediggeráđđi evttoha dál lasihit sin doaibmadoarjaga 800.000 jahkásaččat. Sii ožžot 500.000 lassáneami loahppamánuid ovddas 2025:s.

– Gáisi giellaguovddáš dahká hui nana barggu fállan dihte sámi giellaarenaid buotahkásaš sápmelaččaide Romssas. Sii maid fállet buriid giellakurssaid easkkaálgiide. Danin lean hui movtta go sii dál ožžot vejolašvuođa virgádit vel ovtta olbmo jagi mielde, dadjá West.

Dát vuoruheamit bohtet lassin dáidda vuoruhemiide maid Sámediggi dagai dábálaš bušeahttameannudeamis 2025 ovddas, gos Sámi vahkku Romssas oaččui 300.000 lassáneami.

– Mii sáhttit čielgasit cealkit ahte mii vuoruhit sámi Romsii dán jagáš sámedikkebušeahtas, dadjá duđavaš romsasápmelaš Sandra Márjá West.