Norgga sámiid riikkasearvi (NSR) nanne samegielaid Oslos stuorra vuoruhemiid bokte 2025 bušeahttaárvalusas. Sami viesu giellaguovddážii lasihuvvojit juolludeamit 800.000 ruvnnuin jahkkásaččat (500.000 ruvnnu 2025:s), mii addá sidjiide vejolašvuođa virgádit liige giellaressurssa. Dasa lassin sihkkarastá Sámediggi 600.000 ruvnnu viessoláiggu depositumii 2025:s.
Stuorra giellaáŋgiruššan Osloves
Kategori
Oslo Sámiid SearviDato
11.02.2025
Oslo Sámiid Searvi
Stuorra giellaáŋgiruššan Osloves
Govva: Jonas Driveklepp
Njukčamánus galgá Sámediggi juohkit 50 miljovnna lasseruđa. Giellabargu Oslos lea okta bušeahttavuoitiin Sámediggeráđi bušeahttárvalusas. Sámi viesu giellaguovddáš oažžu vejolašvuođa virgádit liige giellaressurssa, go ožžot 800.000 ruvnnu lassin jahkkásaččat. Dán jagi ovddas ožžot dasto 500.000 ruvnnu lassin.
– Dát lea máilmme buorre ođas Oslo-sápmelaččaide, geat áŋgiruššet buriid giellafálaldagaid ovddas. Giellaguovddáš lea hirbmat dehálaš ásahus, go fállá sihke giellakurssaid ja sámi giellaarenaid oaivegávpogis, muitala báikkálaš sámediggeáirras Tor Gunnar Nystad
Nystad muitala ahte dát čuovvu NSR lohpádusaid nannet fálaldagaid gávpotsápmelaččaide.
– Sámi giellaovdáneapmái lea dehálaš ahte gávpogiin leat sámegielkurssat buriid gielladoaibmabijuiguin, dustendihte dan stuorra dárbbu mii mis lea dáppe gávpogis. Danin lea mu mielas hui movttidahtti go mii leat nagodan sihkkarastit dákkár historjjálaš giellaguovddášáŋgiruššama, mii maiddái boahtá buorrin Oslo Sámi Vissui, loahpaha Nystad.
Oslo sámi viessu oažžu dasa lassin veahki Sámedikkis dáhkidit viessoláiggu boahttevaš jagiin, go sii ožžot 600.000 2025:s várrejuvvon viessoláiggu depositumii.