Doajmmaprográmma

SISADNO:
Sámedigge
Sáme aktisasjbarggo
Giella
Varresvuohta ja hukso
Åhpadus ja mánájgárde
Alep oahppo ja máhttoåvddånahttem
Kultuvrra ja valástallam
Duodje
Duobddága ja birás
Æládus ja årrom
Media ja guládallam
Rijkajgasskasasj barggo
Iellemvuojnno ha vuojŋŋalasj árvo

 

SÁMEDIGGE

VSR ájggu barggat nav vaj:

  • Sámedigge galggá oadtjot ienep vájkkudimfámov daj ássjij gáktuj majt Sámedigge iesj defineri
  • Sámedigge viertti vuorodit aktijvuodav jienastiddjij ja liehket gievra åvdedittjat ássjijt ja dan baktu liehket vuojnnusin sámij guovlojn ja sebrudakdágástallamin dábálattjat
  • Sámedigge oadtju budsjæhttarádádallamijt  stáhtajn
  • konsultasjåvnnåårniga  nanniduvvi ja vaj lága baktu Sámedigge sjaddá duohta konsulterimbielle stáhta ja bájkálasj oajválattjaj gáktuj
  • AN deklarasjåvnnå iemeálmmuk rievtesvuodaj birra ja ietjá rijkajgasskasasj ræjdo sjaddi oassen vuona lágas ja sámepolitihkas
  • Sámedigge galggá aktijvalattjat sæbrrat Sámelága dárkestibmáj
  • åvddånahttet aktisasjbargov stáhta etáhtaj, fylkasuohkanij ja suohkanij
  • prosæssa Sámeriektánammadus 2 vas boahtá jåhtuj. Álgon galggá barggo sámij guovloj guoradallamijn ja identifiserimijn vuoroduvvat.

 

SÁME AKTISASJBARGGO

VSR ájggu barggat nav vaj:

  • aktisasjbarggo arvusmahteduvvá sámij gaskan rijkarájáj iesjgeŋga bielen
  • Nuorttarijka Sámekonvensjåvnnå ratifiseriduvvá ja implementeriduvvá, ja Sáme Parlamentáralasj Ráde åvddånahteduvvá buohta dajna
  • aktisasj sáme giellabarggo gåtseduvvá ja åvdeduvvá
  • Sámeráde åvddånahttemvejulasjvuoda bissu
  • aktisasj njuolgadusá jienastuslågo tjáledibmáj tjielggiduvvi
  • aktisasj dáhtu Sámediggeválgajda Sámen tjielggiduvvá

 

GIELLA

VSR ájggu barggat nav vaj:

  • bærrájgæhttjamorgádna jali oahttse sámegiela gáktuj ásaduvvá, mij máhttá tjårggit vaj sámelága giellanjuolgadusá tjuovoduvvi
  • ásaduvvi ienep sáme giellaguovdátja
  • giellaguovdátjij vuodoruhtadibme nanniduvvá
  • ásaduvvá moattejahkásasj strategalasj prográmma sáme giellaguovdátjijda, mij vaddá giellaguovdátjijda stuoráp máhttelisvuodav prosjevtajt jåhtuj biedjat
  • arvusmahteduvvá ávkástallat giellaguoddijt ja almmamáhtudagáv sámegiellaåhpadusá juohkka dásen
  • sáme bájkkenamá aneduvvi gæjnnogalbajn ja kártajn gånnå sáme bájkkenamá gávnnuji
  • ienep sáme gæjnnonamá adnuj váldeduvvi gånnå dat le luondulasj
  • juohkka almulasj tsiekkadusá sáme guovlojn galbbiduvvi sámegiellaj
  • ásaduvvi sámegielak lájddistiddje ma ulmutjijt måvtåstuhtti sámegielav anátjit ásadusájn
  • dille látjeduvvá sámegiela adnuj diehtojuohkem- ja guládallamteknologijas
  • adnuj båhti hoalle báhkogirje sámegiellaj
  • buvtaduvvi ienep prográmma sámegiellaj dáhtortelefåvnåjda ja næhttabrehtajda
  • sámegiella sjaddá luondulasj oassen mánáj árggabiejves duola degu multimediaj ja girjálasjvuoda baktu
  • máhttá joarkket ållessjattukåhpaduslåpptimav gånnå sámegiella le guovdátjin
  • Sámelága giellanjuolgadusá hiebaduvvi nav vaj sáme addnij dárbo sjaddi guovdátjin
  • Sámelága giellanjuolgadusá hiebaduvvi nav vaj da båhti ávkken divna sámijda, berustahtek makkár suohkanin årru
  • ållessjattuk sámij rievtesvuoda sámegielaåhpadussaj tjårggiduvvi lága ja ruhtadimårnigij baktu, duola degu vaj oassti ulmutjijt friddja bargos oahppama diehti barggoájge.

 

VARRESVUOHTA JA HUKSO

VSR ájggu barggat nav vaj:

  • Sámedigge oadtju rievtesvuodav nammadit stivrraájrrasijt varresvuodaásadusájda
  • sáme spesialisstadoavterguovdásj åvddånahteduvvá sáme máhtudakguovdátjin somáhtalasj medisijna hárráj, ja organiseriduvvá aktan SÁNAG:ijn
  • sáme varresvuoda organisasjåvnå nanniduvvi ja tjårggit addnijorganisasjåvnåj ásadimev, Sámedikke vájkkudamnævoj baktu
  • sáme perspektijvva boahtá aktandoajmmamådåstussaj
  • máhtudahka sáme giella ja kultuvradádjadusá hárráj nanniduvvá Mánáj-, nuoraj- ja fámilljaåssudagán (BUFETAT)
  • hiehtediededimdievnastusán le stuoves sámegielakmáhtudahka
  • gávnnuji buorre dålkkumdievnastusá ja sámegielak diedo sáme pasientajda  skihppijviesojn
  • sáme máhtudahka nanniduvvá Stáhta mánájvieson Råmsån
  • sáme mánáj rievtesvuoda giellaj ja kultuvrraj doajmmi gå gávnadi mánájsuodjalimdievnastusáj, biebbmosijdaj, ja mánájsuodjalimásadusáj
  • tjadáduvvá kampánnja åttjudit sáme biebbmosijdajt
  • ásaduvvá sáme mánájoahttse
  • duohtan dagáduvvá sáme árvvodáhkádus vuorrasijda. Sáme vuorrasijn galggá liehket rievtesvuohta sujttuj gånnå vuorrasij sáme giella ja kultuvrra vieleduvvá
  • SÁNAG:an galggá liehket stuoves sujttimfálaldahka sámijda miehtáj rijka, ja dan baktu  liehket nasjunála máhtudakguovdásj
  • iesjsårmmima duostudimbarggo nanniduvvá
  • ienep fálaldagá ásaduvvi sáme nuorajda gånnå alkohola ij fáladuvá
  • sáme pasienta galggi máhttet hållat sámegielav Pasiænntamanojn
  • sáme skihppijsujtáråhpadus ásaduvvá
  • åhpaduvvi ienep sámegielak varresvuoda- ja sosiálabargge, ja bargge kriminálahuksuj.

 

ÅHPADUS JA MÁNÁJGÁRDE

Mij guosská MÁNÁJGÁRDIJDA de ájggu VSR barggat vaj:

  • lága baktu nanniduvvá individuála rievtesvuohta sáme mánájgárddesadjáj
  • ásaduvvi ienep sáme mánájgárde
  • sáme mánáj ja nuoraj rievtesvuoda giellaåhpadussaj duohtan dagáduvvi diehtojuohkembargo, skåvllåæjgádij åvdåsvásstádusá ja bærrájgæhttjama baktu
  • ienep mánájgárddeåhpadiddje åhpaduvvi gejn le sáme giella- ja kultuvramáhtudahka
  • vatteduvvá ienep ruhtadoarjja sámegielak mánájgárdijda
  • åvddånahteduvvi ienep pedagogalasj viehkkenævo sáme mánájgárdijda

 

Mij guosská SKÅVLÅJDA ájggu VSR barggat vaj:

  • åhpadusláhka rievddaduvvá ja dan baktu sáme mánájda vatteduvvá individuála rievtesvuohta åhpadussaj sámegielan ja sámegiellaj, ja dát duodaj doajmmá duohtavuodan
  • åvddånahteduvvi ja váldeduvvi adnuj modella åhpadussaj oahppijda gejn le sámegiella nubbengiellan ja ma dahki dájt oahppijt dåjmalasj guovtegielagin
  • fálaldahka oahppijda gudi válljiji sámegielav vuostasjgiellan ja åhpadusgiellan vuodoskåvlån galggá liehket avtadássásasj fálaldagájn majt oahppe gejn le dárogiella vuostasjgiellan vuodoskåvlån oadtju
  • oahppe gudi válljiji sámegielav vuostasjgiellan galggi oadtjot nav buorre gå vejulasj ævtojt sjaddat luondulasj giellaguodden sáme sebrudagán
  • aktisasj sáme oahppoplána ja oahpponævo sáme fágajda dagáduvvi
  • ásaduvvi årniga vaj giella- ja kulturguodde aneduvvi álu, ájnas vuorrasap ulmutja resurssaulmutjin árbbediedoj ja sámegiela åhpadime aktijvuodan
  • sáme sierrapedagogalasj doarjjavuogádahka nanniduvvá
  • asstoájggefálaldakårdnigin ja kultuvralasj skåvllåvuossan gávnnu sáme sisadno
  • sáme joarkkaskåvlåj háldadime åvdåsvásstádus sirdeduvvá Sámediggáj
  • sáme joarkkaskåvllå åvddånahteduvvá nasjunála resurssa- ja máhtudakguovdátjin sáme åhpadussaj joarkkaskåvllådásen
  • åhpadusláhka rievdaduvvá vaj vaddá sáme oahppijda rievtesvuodav åhpadussaj sámegiellaj joarkkaskåvllådásen
  • ásaduvvá åhpadusfálaldahka joarkkaskåvllådásen sáme oahppijda divna sáme giellaguovlojn
  • regionála joarkkaskåvlå, aktan fylkasuohkanij, oadtju ásadit sáme sisanov ietjasa fáhkafálaldagájda
  • fáhkaåhpadusfálaldahka boatsojsujtos, duojes, tjoahkkeæládusás ja luondo ávkástallamis nanniduvvá
  • stipænndaårdniga oahppijda gejn le sámegiella fáhkajuohkusin nanniduvvá
  • sámegiella vuostasj- jali nubbengiellan joarkkaskåvlån galggá vaddet lijggetjuokkajt alep åhpadusá sisiválldema aktijvuodan
  • rámmaævto sámegiela åhpadussaj nanniduvvi vaj oahppijda vatteduvvá åhpadus ietjasa gielladásen
  • ásaduvvi ruhtadimårdniga skåvllåklássajda ma hálijdit guossidit ietjá guovlojt Sámen
  • ásaduvvá rájájrasstididdje aktisasjbarggo åhpadusásadusáj gaskan joarkkaskåvllådásen
  • sámegiela guhkásåhpadibme nanniduvvá ja fágalasj åvddånibme tjårggiduvvá
  • dagáduvvá sierra sáme ållessjattukåhpaduspládna, mij sisadná guoradallamav dárbojs, åvdåsvásstádusás ja barggojuogadimes sáme ållessjattukåhpadusán
  • ásaduvvá værmádahka sámegiela ållessjattukåhpadusá aktørajda
  • sámegiella vieresgiellan ja prográmmafáhkan viertti oadtjot doarjjagav stáhtas, ja  juollodime vierttji gåbttjåt skåvllåæjgáda duohta gålojt
  • stáhtta viertti álgadit ja ruhtadit åhpadimev åhpadiddjijda gejn le sámegiella máhtudakmihtto ja vaddet rektorijda vælgov juohket diedojt rievtesvuodaj birra sámegielaåhpadusán
  • sáme oahppijda le máhttelisvuohta buorre sáme oahpponævojda juohkka fágan vuodoåhpadusán
  • galggi vuorodit ådå teknologijav nav vaj sáme skåvllå le åvdemusán mij guosská ådå digitála oahpponævojda
  • sáme árbbedábe, giella, kultuvrra ja vuodulasj árvo gávnnuji oahppoplánan
  • gávnnu máhttelisvuohta åhpadiddjijda sáme máhtudagájn oasteduvvat friddja bargos oahpponævvobargguj
  • åvddånahteduvvi pedagogalasj vuoge sámegiela åhpadussaj.

 

ALEP OAHPPO JA MÁHTTOÅVDDÅNAHTTEM

VSR ájggu barggat nav vaj:

  • Sámi Allaskåvllå ájge milta åvddånahteduvvá sáme universitehttan
  • ásadusá gejn la åvdåsvásstádus ja dåjma sáme alep åhpadusá ja dutkama hárráj nanniduvvi ja arvusmahteduvvi aktan bargatjit
  • dutke arvusmahteduvvi anátjit sámegielav dutkamgiellan
  • oadtjop ienebujt sáme dábálasjfága- ja mánájgárddeåhpadiddjeåhpadussaj, duola degu stipænndaårnigij ja gájdosåhpadusfálaldagáj baktu
  • ienebu válljiji sámegiela alep åhpadusáv, buorep oahppofálaldagáj ja stipænndaårnigij baktu
  • máhtto sáme ássjij birra galggá liehket oassen profesjåvna- ja vuodoåhpadusás juohkka allaskåvlån ja universitehtan
  • sáme åhpadiddjijda gávnnu joarkka- ja lasseåhpadusvejulasjvuoda
  • mujto ja histåvrå bisoduvvi majt bájkálasj ja regionála sáme guovdátja ja siebre li tjoahkkim ja háldadam
  • duodastuvvam sáme árbbediehto máhttá biejaduvvat vuodon dutkamij ja sæmmi ævtoj milta gå dutkam ietján biejaduvvá vuodon háldadibmáj
  • priváhta álgadime doarjoduvvi duodastibmen bájkálasj sáme histåvrråj
  • sáme museajda vatteduvvi resursa váldátjit vuosstáj sáme dávverijt ietjá museajs
  • gávnnuji buorre ruhtadimårniga sáme dutkamij, ja dutkamehtalasj barggo nanniduvvá
  • ásaduvvá stuoves alep åhpadus oarjjelij- ja julevsámegiellaj.

 

 

KULTUVRRA JA VALÁSTALLAM

KULTUVRA gáktuj sihtá VSR dájt ássjijt låpptit:

  • jut ådå sáme girjjetjállijt åttjut
  • jut ienep sáme girjjetjálle bessi girjálasjvuodajn ålles virggen barggat
  • jut buvtaduvvá ienep sáme girjálasjvuohta mánájda ja nuorajda
  • jut aktisasj systebma ásaduvvá váj sáme e-girjijt gilvvet
  • váj juojggama dahkkerievtesvuohta guoradaláduvvá ja sihkarasteduvvá
  • jut sáme musihka ja ådå musihkalasj javllamvuoge ålgusvaddem buoreduvvá
  • jut sáme musihkkára buorep láhkáj bessi sáme musihkav ja juojggamav åvddånbuktet, sihke sáme guovlojn ja rijkajgasskasattjat.
  • jut da festivála ma vuododoarjjagav Sámedikkes oadtju galggi ájn ienebut oadtjot
  • jut unnep festivála ja kultuvrraásadime vijddábut åvddånahteduvvi
  • jut ienep sáme dájddára ja artista rijkajgasskasasj álggoálmmukfestiválajda oassálassti
  • jut sierra sáme teáhterviesso tsieggiduvvá

 

  • jut sáme dájddadávvervuorkká tsieggiduvvá
  • jut sáme dájddárráde nanniduvvá
  • jut Beaivváš Sámi Našunálateáhter ja Åarjelhsaemien Teatere oadtju ienep rudájt
  • jut friddja teáhterjuohkusa oadtju sáme vuosádusájda buvtadimdoarjjagav
  • jut friddja revyajuohkusa bessi sáme revyabargov åvddånahttet
  • jut ienep sámegielak filma buvteduvvi
  • jut sáme filmmaguovdásj vijddásappot åvddånahteduvvá
  • jut sáme filmaj gilvvem laseduvvá márnánfievrridime ja filmmafestiválaj vuosedimij baktu
  • jut ásaduvvi årniga váj tv-prográmma ja filma daj gålmåj sámegielajda tiekstiduvvi
  • váj ienep sámegielak filma dubbiduvvi, sierraláhkáj mánájda ja nuorajda
  • jut dájddársjiehtadus galggá liehket ájnas vædtsak sáme kulturpolitihka åvddånahttemij
  • jut Lullesáme dávvervuorkká doajmmaj boahtá
  • váj juo ásaduvvam sáme vieso doajmmarudá ja åvddånahttemvejulasjvuoda sihkarasteduvvi
  • jut fáhkabirrasa ásaduvvi ma várajda válldi ja vijddábut åvddånahtti juojggamav ja ietjá sáme musihkkaslája juohkka sáme guovlos, duola dagu etnomusihkkaguovdásj
  • jut Sámedigge galggá guovdásj oassálasste gå vuostasj sáme rijkkatjåhkanimev 1917 galggá 100 jage ávvudallat

 

VALÁSTALLAMA gáktuj sihtá VSR dájt ássjijt låpptit:

  • jut sáme nasjonála ja guovlo anlekka nuorttarijkaj tjuojggamij ja boatsojgilppojvuodjem ásaduvvi
  • jut sáme valástallamsuorge, dagu tjuojggam, sjuohppim ja boatsojgilppojvuodjem bessi åvddånahttet
  • jut sáme nuora bessi rijkajgasskasasj valástallamgilppusijda sæbrrat
  • jut stuoráp oasse spellamrudájs manni sáme valástallambargguj ja valástallamhállaj ja anlekkaj ásadibmáj sáme guovlojn
  • sáme valástallamlihtoj dåjmajt nannit

 

DUODJE

NSR galggá dáj åvdås barggat:

  • jut bæssá vuogas láhkáj duodjuhit, ja váj duodjesjiehtadus åvddånahteduvvá vædtsagin duodjeæládusá åvddånibmáj
  • nannit aktisasjbargov Sámedikke ja duodjeorganisasjåvnåj gaskan
  • lasedit duodjebuvdaj vuobddemav márnánfievrridime baktu
  • doarjjot unnep viddnudagájt duojen praktihkalasj ja ruhtadoarjjagijn
  • ienep bagádallevirgijt duojen ásadit
  • viehket duodjárijt juohkka dásen váj oadtju vædtsagijt, dárbbagijt ja lanjájt majt dárbahi
  • álgadiddjijda stipænndaårnigijt ásadit.

 

 

DUOBDDÁGA JA BIRÁS

VSR galggá barggat dáj ássjij gáktuj:

  • globála liegganimev ja dálkádakássjijt låpptit
  • ekologalasj prinsihpa aktan bájkálasj dábij galggi vuodon luonndoadnuj
  • suodjalimprosessa galggi viehkken sáme adnovuogijt ja riektájt nannit
  • sáme riektájt ja sáme luonndovaljesvuodajt sihkarasstet gå ásat industriála dåjmajt sáme guovlojn
  • sihkarasstet prinsihpav jut álggoálmmuga galggi bessat friddja guorrasit praktihkalattjat doajmmá.
  • bærrájgæhttjat jut badjásasj plána bieggamillopárkaj tsieggima gáktuj sáme guovlojn åvddånahteduvvi
  • guollebiebbmama aktijvuodan galggá ásadit areállamávsov mij manná suohkanijda ja ietjá bájkálasj háldadusorgánajda
  • ådå minerálladåjma e sáme guovlojda galga álgaduvvat åvddåla Minerállaláhka Sámedikke gájbbádusájt ållit
  • ehtalasj álggoálmmukstandarda, birrasav, sosiála, varresvuoda ja kultuvra ássje galggi sihkarasteduvvat, ja ekonomalasj buohttidus galggá mávseduvvat gå industriála ja ietjá dåjma dagu minerálaråggåm ja ulljo- ja gássabuvtadibme ásaduvvi
  • Sámedigge galggá liehket birástjuovgga
  • ienep sáme ájrastibme sáme guovloj nasjunalpárkkastivrajn
  • sáme guohtomednamaddne galggi guovlulasj urudisnammadusájn ájrastit
  • urudisnálle galggá dakkir dásen váj boatsojsujtto ja ietjá sáme guohtomæládusá adni buorre judosálkkádus ja li guoddelisá.

ÆLÁDUS JA ÅRROM

Mij guosská BOATSOJSUJTTUJ ájggu VSR barggat váj:

  • boatsojsujto areálasuodjalibme nanniduvvá nasjonála pládnanjuolgadusáj tjadádime baktu boatsojsujttoguovlojda
  • boatsojsujtolága ja pládna- ja tsieggimlága njuolgadusá ådåsmahteduvvi váj boatsojsujtto vájkkudimfábmo sebrudakplánimin nanniduvvá
  • boatsojsujtto bæssá almma láhkáj pládnaprosessajda sæbrrat
  • boatsojsujtto bæssá rijddotjoavddemorgádnaj dagu ietjá æládusá
  • boatsojsujttuj ienep gå dálla sihkarasstá iesjstivrrim, boatsojsujttolága rievddama baktu
  • aktan VBR:ajn, boatsojsujttoháldadusájn ja departementajn tjadáduvvá guoradallam boatsojsujtto boahtte háldadime gáktuj, dasi gullu aj Sámedikke rolla
  • guoddelis moallánagá (ekologalasj, ekonomalasj ja kultuvralasj guoddelisvuohta) sisadno jåhtuj biejaduvvá æládusá siegen.
  • Jernbaneverket gåhtjoduvvá sihkarasstet dajt várnnahij ruovdderahtestihkijt gånnå boahttsu soajtti gåddut
  • giehpedit sálltimav daj guovlojn gånnå boahttsu jåhti.

 

Mij guosská GUOLLIMIJ ájggu VSR barggat dáj ássjij åvdås:

  • sihkarasstet riektávuodov sáme riektájda merravaljesvuodajda.
  • guolástusressursa galggi ienep guovlolattjat háldaduvvat váj bájkálasj ja sáme mierredimev ja árvvodahkamav ásat
  • unnemus vanntsajuogos galggá oadtjot stuoráp oasev kvåvtåjs.

 

Mij guosská EDNAMBARGGUJ ájggu VSR barggat váj:

  • ednambarggo nanniduvvá dáfojn, aktu ja ietjá æládusáj siegen
  • ienep dæddo biejaduvvá bájkálasj ressursaj adnuj ja ávkástallamij, dasi gullu aj laseduvvam bájkálasj vijddásapbuvtadibme
  • binnep kemijalasj sjaddosuoddjimábnnasa aneduvvi ednambargon.

 

Mij guosská MIEHTTSE- ja TJOAHKKEÆLÁDUSÁJDA ájggu VSR dájt ássjijt låpptit:

  • miehttseæládusáj ressurssavuodo ja æládusbarggij riektá nanniduvvi guoskavasj miehttselágajn, árbbedábálasj ressurssaháldadime vuodon
  • tjoahkkeæládusá galggi nanniduvvat målsodis oassen sáme æládushiebadimes
  • motorjåhtulagá regulerim miehtsijn galggá sihkarasstet jut sáme æládusdåjma ja luonndovaljesvuodaj ávkkim lulujin guoddelis láhkáj åvddånahteduvvat
  • Sámedikke rolla nanniduvvá æláduspolitihkalasj ja háldaduslasj ássjijn.

 

Mij guosská SÁME ÁLGADIBMÁJ JA INNOVASJÅVNNÅJ ájggu VSR barggat váj:

  • máhttoguovdásj sáme innovasjåvnnåj ja álgadibmáj ásaduvvá
  • sáme destinasjåvnåj åvddånimbarggo nanniduvvá
  • nasjonála ja guovlolasj mannoæládusvuorodime almma sáme sisanov oadtju
  • sáme álgadimev galggá sihkarasstet, duola dagu álgadimprosjevta Indigee baktu
  • álkkebun dahkat sáme biebbmobuvtadiddjijda árbbedábálasj biebbmoábnnasijt ávkástallat.

 

MEDIA JA GULÁDALLAM

VSR ájggu dáj ássjij åvdås barggat:

  • sámijn li ådås dagástallama ja magasijnnaássje ma gåbttji sáme sebrudagá valjesvuodav iesjguhtik mediaj baktu
  • sáme præssadoarjja åbbålattjat laseduvvá
  • sáme mediaj etihkkabarggo nanniduvvá, duola dagu nav váj sierrá sáme præssafágalasj nammadusáv nammat
  • priváhta mediadåjmadiddjij konsesjåvnnåævto tjuovoduvvi, váj mijájn sámijn le vijdes mediafálaldahka sihke sáme- ja dárogiellaj
  • ienep sámegielak journalista åhpaduvvi
  • bæjválasj sáme mánáj-tv sáddaga
  • Nuoraj-TV ja muodugasj prosjevta maj ulmmejuogos le sáme máná ja nuora galggi ruhtaduvvat.

 

RIJKAJGASSKASASJ BARGGO

VSR ájggu dáj ássjij åvdås barggat:

  • Barentsguovlo álggoálmmugij aktijvuohta ja aktisasjbarggo nanniduvvá ieme vædtsagij baktu
  • álggoálmmuga stuoves sajev Barentsráden oadtju
  • sámij sadje arktalasj aktisasjbargon nanniduvvá
  • álggoálmmukparlamenta åvdåstuvvi AN álggoálmmugij stuoves forumin.

 

IELLEMVUOJNNO JA VUOJŊŊALASJ ÁRVO

VSR ájggu dáj ássjij åvdås barggat:

  • almodit girjálasjvuodav sámijda ja sámegiellaj manna iellemvuojnno le guovdátjin, sierraláhkáj mánájda ja nuorajda
  • ásadit iellemvuojnno- ja árvvovuododum nuorajbargov rijkarájáj rastá
  • arvusmahttet teologija ja filosofija åvddånahttemav sáme vuojnojn
  • nannit sámegielav tjoaggulvisájn
  • nannit sáme sálmmadábijt tjoaggulvisájn
  • guoradallat makta le dárbbo ietjá iellemvuojnnofálaldagá mánájda ja nuorajda sámegiellaj
  • sáme girkkobarggijt åttjudit
  • rievddat giellalágav váj sámijn le riektá aktisasj dagojda sámegiellaj Vuona girkkon
  • nannit arenajt gånnå iellemvuojnno ja vuojŋŋalasjvuohta tjadáduvvi.

Leave a Reply

This site uses Akismet to reduce spam. Learn how your comment data is processed.