Gå sáme mánájn le ham riektá

Mánájda gudi galggi álgget mánájgárddáj Álttán jali Málatvuomen, jali nuoramusájda oarjje-Vuonan gænna dárbbo gájdosåhpadibmáj ij la sihkarvuohta at oadtju lágamierredum riektáv sáme giellaåhpadussaj. NSR oajvvat nasjåvnålasj æjgátværmádagáv, sáme giellagåhttsev ja nannusap riektájt lágajn.

– Moatte sajen dahki huj buorre bargov ja giellaælládahttemijn vuorbástuvvi, valla moadda æjgáda ja máná vilá rahtji riektáj åvdås. Æjgádijs lij muhtema sjaddam jurisstan daj rahtjamusáj sinna. Åbbålasj rahtjamus vájmo gielama åvdås ij la nåhkåm ja boahtte Sámedikkegávda vuorddá edna barggo, javlla Mikkel Eskil Mikkelsen, Vestarmera válggabijra 1.-kandidáhtta.

Æjgáda ja máná vilá rahtji riektáj åvdås. Æjgada lij muhtema sjaddam jurisstan daj rahtjamusáj sinna.

Mánájgárdde – dat mij vuodov dahká

Miehtáj Sámeednama lij rahtjalis ulmutja ásadam ja álgadam sáme mánájgárdijt gå nevralussjam lij fálaldagáv ietján. Danen lij vilá uddnik sáme mánájgárde priváhta æjggoma vuolen. Ájgge la ållim suohkanijda nannit ietjasa fálaldagáv ja dan baktu sihkarasstet sáme giellaælládahttemav nanos fálaldagá baktu.

– Sáme mánájgárddefálaldahka ij la hájn juoga mav bessap vissásin adnet. Sáme máná Alttán åhtsålij sajev ja boahtte jage kánnu gádulmahttep sáme mánájgárdev Málatvuomen. Dálla dárbahip sáme mánájgárddegarantijav ja nåvkå sáme mánájgárddesajev. Jusska mån anáv ájnnasin nannit sámemánáj riektájt de la mánájgárddelága baktu vælggogisvuohta suohkanijn bærrájgåhtset sáme gielav ja kultuvrav miehtáj Vuonarijka, javlla Mikkelsen.

Skåvllå mij sihkarasstá boahtteájgev

Boahtte Sámedikkegávda mierreduvvá ådå åhpadusláhka. Åhpadusláhka mierret makkir riektá la sáme mánáj åhpadussaj sámegielan ja sámegiellaj ja gåktu dat tjadáduvvá.

Dálla la ájgge ållim sihkarastátjit riektájt, åhpadit ienep åhpadiddjijt ja doarjjot sáme mánájt ja æjgádijt giellagåhttse baktu.

– Muv ájgij tjadá la NSR:a agev nevralussjam riektájt ietjama iednegiellaj. Stuorámus barggo boahtte niellja jage la sihkarasstet sáme mánáj dárbov ja at láhka bælost sijájt. Dan prosessan la ájnas at sáme æjgáda gulluji. Danen la dárbbo ásadit nasjonálla sáme æjgátværmádagáv, javlla Aili Guttorm, Oarjje-Vuona válggabijra 2.-kandidáhtta.

NSR ájggu válga baktu nannit riektájt åhpaduslágan ja mánájgárddelágan, ja plánniji ásadit sáme giellagåhttsev ja násjonálla sáme æjgátværmádagáv.

– Manemus jagijt lep barggap ålov sisanujn skåvlån ja mánájgárden buojkulvissan Sámedikke mánájgárddeprosjievta baktu ja aj nannim sáme sisanov oahppoplánajn. Dálla la ájgge ållim sihkarastátjit riektájt, åhpadit ienep åhpadiddjijt ja doarjjot sáme mánájt ja æjgádijt giellagåhttse baktu. Da galggi bessat jurisstan sjaddamis gå rahtji åhpadusá åvdås, javllá Piera Heaika Muotka, Oarjje-Vuona válggabijra 3. kandidahtta.