NSR

Soahpan stivret Sámedikki

– Leat leamaš dárkilis ja buorit šiehtadallamat šiehtadusbeliid gaskka. Mis lea leamaš buorre vuođđu go leat leat juo ovttasbargan njeallje jagi, dadjá (NSR). – Mii leat mii earret eará bidjan olu deattu ságastallamiin vuoruhit dárbbu eambbo sámegieloahpaheddjiide ja mánáidgárdeoahpaheddjiide, dadjá son.

Vuođđoealáhusat leat dehálaččat sihke NSR:ii, Gb:ii ja JSL:ii. Boahttevaš jagiid šaddá ovttasbargoguimmiide dehálaš sihkkarastit ahte vuođđoealáhusat besset ovdánit buoremus lági mielde.

– Guovddášbellodat lea šiehtadallan oažžut buriid politihkalaš čovdosiid boahttevaš jagiide, dadjá Cecilie Hansen (Gb). Mii leat ilus go leat soahpan vuođu mii ovddida olu áššiid mat leat dehálaččat Guovddášbellodahkii, earret eará vuođđoealáhusaid oktavuođas, dadjá Hansen.

– Mii leat duhtavaččat go ovttasbargu jotkojuvvo ja mis lea boazodoallu okta min guovddáš váldosurggiin, dadjá Berit Marie Eira (JSL). Lea ásahuvvon boazodoalloriektelávdegoddi mii galgá geahčadit boazodoallolága, dadjá Eira, gii oaivvilda ahte Sámediggi galgá čuovvolit dán barggu ja ahte das lea hui stuora mearkkašupmi boahttevaš jagiid.

Šiehtadallamat leat bistán golbma vahkku ja šiehtadallanbealit leat soahpan viiddis ovttasbargojulggaštusa ja praktihkalaš beliid šiehtadusa oktavuođas.

– Mun ovdanbuvttán ođđa sámediggeráđi mánnodaga 18.10 vuođđudanvahkkus, dadjá Silje Karine Muotka (NSR). Dalle mii bovdet preassakonferánsii Kárášjogas gos buot ráđđelahtut oassálastet. Dalle ovdanbuktojuvvo maiddái ovttasbargojulggaštus. Iešguđetge ráđđelahtuid áššesurggiid birra muitalan gaskavahkku 27.10.

Silje Karine Muotka lea duhtavaš šiehtadallamiid bohtosiin.

– Leat leamaš buorit šiehtadallamat ja olu áŋgiruššan, dadjá Muotka, gii maiddái galgá jođihit politihkalaš barggu sámediggepresideantan boahttevaš njeallje jagi.

– Bealistan lea leamaš mávssolaš sihkkarastit ahte buot ovttasbargobealit dovdet eaiggátvuođa politihkalaš ovttasbargojulggaštusa ektui ja ahte háliidit áŋgiruššat dan ovdii, ja ahte julggaštus duste daid dárbbuid mat sámi servodagas leat. Julggaštus ferte dustet daid hástalusaid ja vejolašvuođaid maid mii oaidnit boahttevaš njeallje jagi ja maiddái guhkit áiggi perspektiivvas, dadjá Muotka.