2023 Bušeahttaárvalus: vuoruheamit Ávjovárrái

NSR Sámediggeáirras Ávjováris Maren Benedicte Nystad Storslett lea duđavaš go Beaivváš Sámi Našunálateáhter ja RiddoDuottarMuseat lea vuoruhuvvon 2023 bušeahtas.

Kategori
Guovdageainnu sámiid searvi

Forfatter
Guovdageainnu sámiid searvi
Dato
01.11.2022
Guovdageainnu sámiid searvi


2023 Bušeahttaárvalus: vuoruheamit Ávjovárrái

Ikte almmuhii Sámediggeráđđi 2023 bušeahttaárvalusa. Lea gáržžes bušeahtta dillii, gos leat ferten dahkat garra vuoruhemiid. Sámedikki bušeahtta lea dušše lassánan 2,35% diimmáža rájes, muhto haddegoargŋun servodagas lea 3,5%.

«Vaikko lea gáržžes bušeahtta dilli, lean duđavaš go Beaivváš Sámi Našunálateáhter ja RiddoDuottarMuseat lea vuoruhuvvon 2023 bušeahtas» dadjá Maren Benedicte Nystad Storslett, NSR Sámediggeáirras Ávjováris.

Beaivváš Sámi Našunálateáhterii lea árvaluvvon 500 000 ru lassáneami boahtte jagi. NSR ja eanetlohku Sámedikkis áigu áiggis ovdal ođđa teáhtervisti nannet Beaivváža Sámedikki bušeahta bokte. Ođđa Beaivváš Sámi Našunálateáhtera ja Sámi joatkkaskuvlii ja boazodoalloskuvlla vistit huksen álggahuvvui dán giđa, ja galgá plána mielde leat gárvvis 2024 geasi.

«Beaivvážis lea dehálaš bargu ovdánahttit ja čalmmustit sámi muitalanárbevieruid ja lávdedáidaga. Mun illudan go beassat ođđa visti galledit. Jáhkán maid olu miellagiddevaš ovttasbargui buktit go Beaivváš ja Sámi joatkkaskuvla šaddaba seamma dáhki vuollái. Kánske sáhtášii álggahit musihka, dánsun ja teáhter suorggi deike Guovdageidnui? Mas sáhttá čiekŋudit luohteárbevieruide ja teáhter suorgái. De han livčče hui miellagiddevaš, ja maid dehálaš rekruteremii sámi dáidda ja teáhter suorgái».

«Duodjesuorggi sáhttá maid ovdánahttit. Man somá ii livčče jus mis sierra sámi scenografiija fága joatkkaskuvllas? Sáhtášii ovttasbargat Beaivvážiin, Beassášmárkanin ja Sámi Grand Prixain. Ja visot dát han lea dáppe Guovdageainnus!»

Govven/foto: Aslak Mikal Mienna

RiddoDuottarMuseai (RDM) lea maid evvohuvvon 300 000 ru lasáhusa hálddašit dáiddačoakkáldagaid, ja eanetlohku áigu bisuhit lassáneami 2021 rájes bargui mii galgá duođaštit historjjá Álttá-Guovdageainnu čázadaga dulvadeamis.

«RiddoDuottarMuseat lea dehálaš bargu hálddašit ja gaskkustit sámi dáidaga. Mii fertet sihkkarastit RDM buori eavttuid oastit sisa, fuolahit ja gaskkustit min dehálaš kulturárbbi. Sis lea maid dárbu ođđa vistái dán bargui. Danne lea buorre go ráđđehus maid lea evttohan ruhtadeami viidáset plánemii ođđa vistái RDM Kárášjohkii».

Dasa lassin oažžu Sámi Allaskuvla 500 000 ru álggahandoarjaga čálliidohppui.

«Dasa lassin lea eanetlohku evttohan nuvttá sámi mánáidgárdesajit ja álggahit stuora rekrutterenprošeavtta sámi oahpaheddjiide- ja mánáidgárdeoahpaheaddjeoahpuide, mii lea dehálaš vuoruheapmi barggus nannet sámegiela dili ja eambbo giellageavaheddjiid oažžut. Dieđusge mii háliidat vuoruhit visot min lohpádusaid oktanaga. Muhto lea vel golbma jagi dán Sámediggeáigodagas, ja mis leat stuora áigumušat ja maid vuordámuš ahte mii bidjot dan dillái ekonomalaččat sáhttit čađahit daid».

Dás sáhtát lohkkat boahtte jagi bušeahtta vuoruhemiid. 

Loga olles bušeahtta 2023 árvalusa.