Niko Valkeapää háliida oktasaš sámi válgabeaivi
– Mii NSR:s háliidat oktasaš sámi válgabeaivvi Sámedikkiide Norggas, Ruoŧas ja Suomas, dadjá Niko Valkeapää guhte lea NSR goalmmátevttohas sámediggeválggain.
Norgga Sámiid Riikasearvi (NSR) ovdánahttá iežas politihka guhkesáiggi višuvnnain ahte boahtteáiggis galgá leat oktasaš sámi almmolašvuohta ja ahte stádarájit eai galgga hehttet sámeálbmoga ovttasdoaibmama.
– Dál mis buori muddui váilo oktasaš sámi almmolašvuohta. Mis leat Ođđasat mat addet midjiide vejolašvuođa oaidnit mii dáhpáhuvvá riikkaráji nuppi bealde, ja mis leat iešguđetge konferánssat ja mis lea valáštallan, muhto muđui leat mis unnán arenat ovttasbargui, dadjá Valkeapää.
NSR-politihkkár Valkeapää lea riegádan suoma bealde Sámis, ja orru dál norgga bealde. Son oaivvilda ahte oktasaš válgabeaivi sáhttá leat buorre álgu ovttasbargat rájiid rastá.
– Jus Sámedikkit válljejuvvojit oktanaga ja seamma guhkes áigodahkii, de šaddá sidjiide álkit ovttasbargat. Dasa lassin lean viissis ahte mis dalle sáhttet leat oktasaš almmolaš digaštallamat ja debáhtat válgagiččus, áibba eará láhkai go mis dál lea, dadjá Valkeapää.
Dál leat norgga bealde sámediggeválggat čatnon stuorradiggeválggaide. Valkeapää oaidná eará beliid maid sierra válgabeivviin Sámedikkiide. Son diehtá earret eará ahte máŋgasat ballet ahte válgasearvan njiedjá jus válgabeaivi sirdo.
– Ieš smiehtan ahte leat stuorra hástalusat čatnon dasa ahte válggat leat seamma beaivvi, earret eará go sámediggeválggat dávjá oalát jávket álbmotdigaštallamis go stuorradiggeválggat ožžot eanaš fuomášumi. Mii guoská teknihkalaš čađaheapmái válggaide de ii leat datge odne váttisvuođaid haga go čuovvut stuorradiggeválggaid vuogi. Mun jáhkán mii nagodit ráhkadit buriid vuogádagaid iežamet válgačađaheapmái, loahpaha sámediggeevttohas Niko Valkeapää.
