Válgajearahallan: Rašis ovttaskasolmmoš
– Mii fertet vuostálastit cielaheami sápmelaččaid ja sámevuođa vuostá neahttadigaštallamiin ja sosiála mediain. Tor Gunnar Nystad lea duođas fuolastuvvan mo neahttacielaheapmi váikkuha ovttaskasolbmuide. Neahtas leavvá sihke persovdnafalleheapmi ja olles joavkkuid cielaheapmi.
– Lea váivi sutnje geasa čuohcá. Cielaheapmi sámevuođa vuostá dagaha ahte máŋggas garvet muitaleames ahte sis lea sámi duogáš, muitala Nystad gii lea NSR 3. evttohas lulli-Norgga válgabiirehis.
Son beroštuvvá go lea dán fáttá birra sáhka ja čilge áinnas. – Lean máŋga jagi orrun Osloguovllus ja lean oahppásnuvvan sápmelaččaiguin geat leat eret juohke sajis riikkas. Lea hirpmástuhttit man galles geassádišgohtet go šaddá sáhka sámevuođas. Oainnán ahte dás lea oktavuohta dainna bistevaš negatiiva deaddagiin man mii dovdat sámevuođa ektui, erenoamážit neahtas.
Identitehta lea rašis fáddá
Tor Gunnar, gii beaivválaččat bargá singuin geat leat rašis dilis servodagas barggustit konsuleantan/integratiiva-terapevtan Oslo Universitehta buohcciviesus, lea oaidnán mo olbmot reagerejit go vásihit juoga negatiivva mii guoská sidjiide.
– Go lea sáhka identitehtas ja iešáddejumis de leat mii ovttaskasolbmot rašit. Mis, politihkkárin ja almmolaš olbmožin, lea ovddasvástádus. Álgagat ja doaibmabijut mat eastadit cielaheami, erenoamážit neahttacielaheami, leat rámidanveara, dadjá Nystad. Son háliida dál ahte cielaheamieastadeapmi vuoruhuvvo vel eanet.
