Sámediggi háliida gulahallat girjebussiid oamasteddjiiguin
Sámedikkeeanelohku ovddida mearkašumi gos bivdet sámedikkeráđi šiehtadallat girjebussaovddasvástideddjiigu
– Gielddaid ja fylkkagielddaid ovddasvástadus gaskkustit ja ovddidit girjerájusfáladagaid lea čielggas. Dattege leat ovddasvástideaddjit deattuhan ahte sámedikke doarjja lea dárbbašlaš nagodit doaimmahit girjebussaid. Danne háliidat mii dál addit vejolašvuođa šiehtadallat ođđa ruohtadoarjjamálliid gos girjjálašvuođa gaskusteapmi lea guovddážis, dadjet Cecilie Hansen (guovddášbellodat) Márjá-Liissá Partapuolis (NSR-SáB) ja Ánde Somby Jr (JSL).
Árvalus mii ovddiduvvui lávdegottevahkkus bissu rievddakeahttá, muhto joavku addá vejolašvuođa gávdnat ođđa doarjjamálliid gos váldoruhtadeapmi galgá boahtit guovllu ovddasvástideaddjiid bokte.
– Eanetlogu árvalus, mas ulbmil lea ovdditdit ja buvttadit girjjálašvuođa buot geavaheaddjiide ođđa gaskaoamiid bokte, lea ain vuođđun. Muhto jus girjebusseovddavástideaddjit hálidit váldit stuorit ovddasvástádusa iežaset bussiin ja háliidit gávdnat buoret ruhtadančovdosiid de mii leat gárvásat árvvoštallat vejolaš doarjjaortnegiid. Danin bivdit Sámedikkeráđi ráđđádallat fylkkagielddaiguin ja gielddaiguin, geahččandihte makkár dáhttu sis lea, dadjá Márjá-Liissá Partapuoli (NSR-SáB).
Sámediggeráđđi oažžu dál dievasčoahkkimis válddi dahkat šiehtadusaid main gielddat ja fylkkagielddat váldet ovddasvástádusa girjebussiid doaimmaheamis ja main Sámediggi doarju doaimmaid mearriduvvon rámmaid siste.
– Sámediggi ii sáhte váldit ovddasvástádusa oastit ođđa bussiid go dál daid šaddá oastit. Dát rehket meroštallojuvvo gártat 70 milliuvnna ruvnno ja lea čielga ášši ahte Sámediggi ii sáhte dán máksit, seammás go vuoruha ođđa girjjálašvuođapolitihkka, dadjá JSL parlamentarálaš jođiheaddji Ánde Somby Jr. Son oaivvilda maiddái ahte girjebusset fertejit heivehit iežaset dan ođđa girjjálašvuođapolitihkkii ja geahčadit mo gaskkusta girjjálašvuođa dálá vuogádaga bokte.
– Girjebussiid oamasteaddjit fertejit geahčadit mo ieža sáhttet gaskkustit sihke girjjálašvođa ja kultuvrra njuovžileabbot. Áinnas sihke luođi, sámi mánáidteahtera ja sámi poesija bokte, joatká Ánde Somby Jr.
Olles mearkkašupmi:
Sámediggi fuomášahttá ahte girjebussaid ovdasvástideaddjit leat čájehan dáhttu, earret eará gulahallancealkámušaid bokte, viidáset doaimmahit girjebussaid eará doarjjamálliid bokte. Sámediggi bivdá sámedikkeráđii šiehtadallat jus dálá girjebussaid ovddasvástideaddjiiguin lea dáhttu gávdnat beaktilis doaimmahan- ja doarjjamálle báikkálaččat dahje regiunálalaččat. Sámediggi bidjá eaktun šiehtadallamii ahte eat sáhte guoddit boahteáigge ođasmahttingoluid bussaide, ja ahte doaimmahandoarjja juolludeapmi juohke bussii ii galgga leat eanet go 500 000 kr.
