Almmuhus – Ráđđeaddi NSR sámediggejovkui
Norgga Sámiid Riikkasearvi (NSR) almmuha 50 % engašemeantta sámediggejoavkku ráđđeaddin.
Virgi heive ohcciide geain lea stuora beroštupmi sámepolitihkkii ja muđui servodatdilálašvuođaide, ja gii sáhttá doarjut NSR politihka ja višuvnnaid.
Ráđđeaddis lea lagas ovttasbargu parlamentáralaš jođihangottiin ja son doaibma dan čállin. Váldooassi bargodoaimmas lea veahkehit sámediggejoavkku siskkáldas máhttoovdánemiin, ja olggos guvlui fuolahit preassadieđáhusaid ja neahttaáššiid, čuovvut ja doaimmahit sosiála mediaid ja čoahkkimiid lágidit.
Virggis ferte rehkenastit mátkkošteami ja huššás barggu dan oktavuođas go Sámedikkis leat lávdegodde- ja dievasčoahkkimat ja vejolaš joavkočoahkkimat seamma áigodagain.
NSR sámediggejoavku ohcá ráđđeaddi geas lea nanu vuođđoipmárdus sámepolitihkalaš áššiin ja gii nákce alccesis háhkat dárbbašlaš máhtu. Ráđđeaddis fertejit leat buorit čállinattáldagat. Máhttu deaivilit ovdanbuktit politihkalaš áššiid almmolašvuhtii vuoruhuvvo. Sámegielmáhttu lea ovdamunni.
Engašemeanta (gaskaboddosaš virgi) bálkáhuvvo šiehtadusa mielde ja bistá Sámedikki válgaáigodaga. Danne loahpahuvvo engašemeanta čakčamánus 2021. NSR:s leat kánturbáikkit Guovdageainnus ja Kárášjogas, muhto mii sáhttit mieđihit eará bargobáikki ja bargu sáhttá maiddái heivehuvvot doaimmahuvvot ruovttukantuvrras.
Ohcama mielde dáhttut mii ohcci sáddet iežas buvttadan geahččalančállosa preassadieđáhusa hámis. Vállje juoppá guovtti vejolaš case gaskka: 1: NSR sámediggejoavku galgá dadjat juoidá bieggafápmorusttega birra mii lea plánejuvvon ásahuvvot boazoguohtunguvlui. 2: NSR áigu vuosttaldit guollebiepmahaga ásaheami mearrasámi luossavutnii.
Ohcan ja CV ja mieldečuovvu geahččalančálus sáddejuvvo deike nsr@nsr.no ođđajagemánu 5. beaivái 2018.
Gažaldagaid sáhttá vástidit parlamentáralaš jođiheaddji Runar Myrnes Balto. Telefovdna 977 73 778 dahje e-poasta runar@nsr.no.
