Partapuoli lávdegoddejođiheaddjin

Otná dievasčoahkkimis válljejuvvui deatnulaš, Márjá-Liissá Partapuoli, jođiheaddjin Bajásšaddan-, fuolahus- ja oahppolávdegoddái, Sámedikki gávccát áigodagas. Fágalávdegottis leat oktiibuot 13 láhttu ja galget hábmet sámedikke politihkka sin fágasuorggis. Partapuolis lea duogáš nuoraidpolitihkas, ja lea oasálastán 2007 rájes. Son lea maiddái bargan sihke skuvllain ja mánáidgárddiin, ja lea dasalassin stivrraláhttu Deanu Sámesearvvis, geain lea iežas mánáidgárdi hálddus. Sámedikkis ovddasta Partapuoli NSR- SáB oktasaš listtu. Muđui son beaivválaččat bargá prošeakta inšenevran ja jođihanvásáhus sihke oahppu ja bargguid bokte.

– Lea hui gelddolaš go fidnejin dákkár deaŧalaš ámmáha. Illudan deaivat lávdegotti ja doaivvun ahte mii sáhttit bures ovttasbargat vaikke vel eat gula seammá bellodagaide, dadjá Partapuoli.