Ođđalágan bargosajit
Márjá-Liissá Partapuoli oaidná čuvges boahtteáigi bargosaji ásaheamis ja čujuha hutkásvuhtii ja gelbbolašvuhtii sámi gründáriid gaskkas.
Danne illuda go beassá ovddidit ođđalágan bargosajiid ásahanpolitihka dáid válggaid. NSR dáhtu doarjut fitnodagaid mat dustet álggahit bargosajiid mat eai bilit luonddu eaige hehtte sámi kultuvrra.
– Dál lea áigi geahččagoahtit bargosajiid mat leat bistevaččat, seammás go gáhttejit luonddu. Eat mii NSR:s sáhte dohkkehit luonddu billisteami, ja ahte luonddugeavaheaddjit dego boazodoallit, guolásteaddjit ja meahcásteaddjit galget ohpit čáhkket saji ruvkkiide ja bieggamilluide, cealká Partapuoli gii lea 1. evttohas NSR- SáB:s Nuortaguovllu válgabiirres.
Boahtte áigodagas lea NSR:s áigumuš álggahit vuođđudanstrategiijaid ja sámi gealboguovddáža, mas ulbmil lea rávvet ođđaáigásaš bargosajiid ásahemiid ja mo ekonomalaš doarjagiid fidne.
Neahtta
Márjá-Liissá oaidná vejolašvuođaid mat maiddái heivešit Detnui gos ieš orru. Geassá erenoamážit ovdan digitála máilmmi ovdáneami go hállá ođđalágan bargosaji ásahemiid vejolašvuođaid mat eai gáibit olus eanangeavaheami.
– Mis lea dáid áiggiid mealgat buoret vejolašvuohta álggahit virtuála fitnodagaid ja bargosajiid. Fertet fuobmát makkár vejolašvuođaid ovdamearkka dihte interneahtta addá midjiide. Mii fertet maid bidjat searaid dasa ahte movttiidahttit ođđa jurddašeami nu ahte earát maid oidnet dáid vejolašvuođaid. Dáid bargosajiin sáhtát rievtti mielde bargat vaikko gos ja vaikko maid, loahpaha Márjá-Liissá boahtteáigge doaivagiin.
Govva: Marie Louise Somby
