Searválagaid

NSR searvá válggaide sámi oktasašvuođa jurdagiin, go mii diehtit ahte álbmogiin mii leat gievrramusat go bargat searválagaid. Ávvudanjágis mii searvat válggaide oktasaš sámi čovdosiiguin beroškeahtta gos mii orrut.

2017:s ávvudat mii 100 jagi sámi organiseremiin. Fiinna álbmotbeaivvedoalut Troandimis guovvamánus ja dat positiivvalaš fuomášupmi dan oktavuođas, dagahii buori sámi iešdovdui ja rámisvuhtii. Muittuhuvvuimet ahte mii leat okta álbmot oktasaš hástalusaiguin ja ahte mii dárbbašat oktasaš čovdosiid.

NSR searvá válggaide sámi oktavuođa jurdagiin. Mii leat leamaš organisašuvdna sápmelaččaid ovttasbarggu várás measta 50 jagi, ja okta min vuođđojurdagiin lea ahte álbmogin mii leat gievrramusat go bargat ovttas. 2017:s searvat mii válggaide áigumušain ahte Sámediggi galgá stáđisin bisuhit fokusa daid ollu áššiide mat gusket midjiide buohkaide, ja mii searvat válggaide plánaiguin maid mihttun leat oktasaš sámi čovdosat beroškeahttá gos mii orrut.

Mis leat máŋggaid logijagiid leamaš máŋga sámi vuoittu, muhto min kultuvra, min gielat ja min ealáhusat leat ain hui garrasit áitojuvvon. Seammás vásihat mii ahte guovddáš eiseválddiin váilo máhttu ja dáhttu sámi áŋgiruššamii. Mii bargat politihkalaš čovdosiid ovdii, muhto jus lea dárbu de ii hilggo NSR jurdaga geahččalit sámi áššiid duopmostuoluin, ja dáinna lágiin oažžut našunála sámepolitihka rivttes bálgá ala.

NSR áigu, nu go mii leat dahkan measta 50 jagi, joatkit rahčat gillilit min vuoigatvuođaid ovddas álbmogin. Dan mii sáhttit lohpidit.

Min neahttasiidduin sáhtát lohkat makkár politihkain mii searvat válggaide ja makkár evttohasat leat min listtuin.