Muitosánit Olav Magnar Dikkanenii (1932–2013)

Lossa mielain vuostáiválddiimet dieđu ahte Olav Dikkanen lea vádjolan. Morrašis mii gudnijahttit su eallima ja áŋgiruššamiid sámi servodaga ovddas.

Višuvnnalaš ja duostilis sámepolitihkalaš ovdamanni lea dál vádjolan.

Olav Dikkanen lea bargan áŋgirit sámi kultuvrrain ja sámepolitihkain olles rávis agis. Son lea beroštan sámepolitihkas sihke báikkálaš ja riikkaidgaskasaš dásis. Olav lea doaimmahan sámi servodathuksema gielddapolitihkalaš dásis Bargiidbellodaga ovddas dakkár áiggis go sámeáššiiguin ii lean álki bargat. Son lei mielde ceggeme Unjárgga sámiid searvvi 1972:s ja son válljejuvvui Várjjaga válgabiirre NSR sámediggeáirrasin vuosttaš Sámediggái 1989:s. Son čohkkái Sámedikkis njeallje áigodaga, gitta 2005 rádjai. Son lea maid čohkkán NSR riikkastivrras ja Davviriikkaid sámiráđis. Son lea maid leamaš aktiiva Sámelisttus, mii dasto šattai Unjárgga Sámeálbmotbellodahkan.

NSR:s dovddaimet Olava sámi servodaga duostilis bealušteaddjin, geas ledje boahtteáiggi áigumušat ja doaivagat. Son beroštii ollu surggiin, sihke ealáhus-, giella- ja kulturpolitihkas, muhto erenoamážit duodji ja guolástus ledje su váibmoáššit. Olav lei maid dovddus juoigi ja nana valáštalli.

Sámi idealistan lei unjárgalaš álo gearggus muitalit maid son jurddašii ja oaivvildii. Olavis lei erenoamáš sártnončehppodat ja son hálddašii árbevirolaš muitalanárbevieru erenoamáš bures: son ovdanbuvttii ságaidis njuovžilit ja eallásit. Dan dihte oaččui son dávjá sierra hállanáiggi čoahkkimiin. Olav lei resursaolmmoš ja movttiidangáldu midjiide earáide NSR:s ja mii duostat lohkat ahte dan son maiddái lei sámi servodahkii. NSR riikkačoahkkin gudnijahtii Olav Dikkanena gudnebálkkašumiin 2010:s.

Olav lei doaimmalaš maŋemus beivviid rádjai ja oallugat besse su deaivat máilmmi riikkaidgaskasaš álgoálbmotkonferánssas Álttás geassemánus dán jagi. Mii oaččuimet dan gova ahte son sakka illudii go beasai deaivat sihke sámepolitihkkáriid ja álgoálbmogiid eará guovlluin máilmmis. Dát illu ja mokta ain movttiidahtii nuorat buolvva, geat dál galget fievrridit sámepolitihkalaš árbbi viidáset.

Mii váldit oasi su lagamuččaid morrašis ja giitit daid bargguid ovddas maid Olav lea doaimmadan sámi servodaga ovddas. Ráfi lehkos Olav Magnar Dikkanena muitui.