Válgajearahallan: Ii fal ruvkedoaimma
Áilen Nigá Máhtte, NSR nubbinevttohas Ávjovári válgabiires, vásiha ahte fitnodagain ja eiseválddiin lea hoahppu viežžat luondduriggodagaid Sámis, dán son ii áiggu dohkkehit. Loga válgajearahallama suinna dás.
Boazodoalli ja sámediggeáirras Áilen Nigá Máhtte vávjá ahte sisabahkkemat sámi guovlluide lassánit aht’ lassánit. Ruvkefitnodagat ja ráđđehus barget garrasit ásahit ođđa ruvkkiid sámi guovlluide. Dása ii liiko Máhtte.
Vuođđoealáhusaid eatnamat leat juo gáržžiduvvon jagiid čađa. Dál mis ii leat bovdna, ii geađgi, ii muorra šat massit eará doaimmaide, beaškala Máhtte. Son ballá ahte bistevaš boazodoallu ii leat šat vejolaš boahtteáiggis jus sisabahkkemat joatkašuvvet.
– Vásihan ahte fitnodagain ja eiseválddiin lea hirbmat hoahppu roggat ja viežžat eret riggodagaid min eatnamiin. Eai váldde vuhtii luonddu eai ge min geat árbevirolaččat leat geavahan dáid eatnamiid, šuohkiha Máhtte. Muhto ii son leat heađisge vuollánan.
Gearggus bissehit
Otnáš minerálaláhka ii váldde sámi beroštumiid doarvái bures vuhtii. Danin lea NSR mearridan ahte sii eai doarjjo ruvkedoaimma sámi guovlluin. – Sámediggi ferte čielgasit vuosttildit ruvkkiid ásahemiid Sápmái. NSR lea dása dáhkideaddjin, lohpida Máhtte. Son bures muitá go dalá sámediggepresideanta Ole Henrik Magga bissehii ruvkefitnodaga Ráiteváris.
– Mii leat gergosat fas bissehit ruvkefitnodagaid jus eai guldal min, loahpaha Áilen Nigá Máhtte.
